–रीदमसिंह ठकुरी, बझाङ
असोज पहिलो साता देखि बझाङबासीले राष्ट्रिय प्रसारण लाइनको विद्युत उपभोग गर्न पाउने भएका छन् । बर्षौदेखि विद्युतको समस्या झेल्दै आएका जिल्लाबासीहरु केन्द्रीय प्रणालीको विद्युत उपभोग गर्न पाउने भएपछि खुशी भएका हुन् ।

जिल्लाका १२ स्थानीय तहका नागरिकहरु अहिलेसम्म स्थानीय लघुजलविद्युतको भरमा बस्दै आएका छन् । नेपाल विद्युत प्राधिकरणले सदरमुकाम चैनपुर र आसपासका क्षेत्रमा असोज पहिलो सातादेखि केन्द्रीय प्रणालीको विद्युत बाल्ने योजना बनाएको छ ।

बैतडीको श्रीभावरबाट शुरु भएको लाईन तथा पोल बिस्तारको काम र चैनपुरको सेलाखेतमा ट्रान्समिटर राख्ने काम समेत पुरा भईसकेको छ । प्राधिकरणले ३३ केभी लाइन बिस्तार गरी जयपृथ्वी नगरपालिकाका केही र सुर्मा गाउँपालिकाका केही वडामा मात्रै बत्ती बाल्ने तयारी गरेको नेपाल बिद्युत प्राधिकरण अत्तरियाका इन्जिनियर तिजबहादुर गुरुङले जानकारी दिए । उनका अनुसार राष्ट्रिय प्रसारण लाईन सदरमुकाम नजिकै रहेको सेलाखेतमा एकसय एम्पीएरको ३३ हजार भोलटेजका दुईवटा ट्रन्समिटरमार्फत चैनपुर लगायत आसपासका क्षेत्रमा बिजुली बालिनेछ । यो सँगै जिल्लाका १८ सय घरधुरी झिलीमिली हुने भएको छ ।

२०४७ सालमा नेपाल बिद्युत प्राधिकरणले नै सदरमुकाम चैनपुरलाई लक्षित गरि दुईसय किलोवाट क्षमताको लघु जलबिद्युत निर्माण गरिदिएको थियो । २०५० सालदेखि सुर्मादेवी बिद्युत प्रालीले विद्युत वितरणको जिम्मा पाएको थियो । चैनपुरमा बिद्युतको क्षमता कम र बितरण बढी भएको र कुनैबेला पानीको अभावका कारण पनि विद्युत नियमित भने हुन सकेको थिएन् ।

बिद्युत कै कारण सदरमुकामको ब्यापार व्यावसायमा समस्या भएको चैनपुरका ब्यबसायी नगेन्द्र खड्काले बताए । ‘अब राष्ट्रिय प्रसारणको विद्युत आएपछि आशा जगाएको छ ।’ उनले भने, ‘यो हामी सबैको खुशीको विषय हो । अब अन्धकार सदरमुकाम चैनपुर पनि उज्यालो हुने भयो ।’ हाल जिल्लाका १२ स्थानीय तहमा ४६ भन्दा बढि लघुजलविद्युत रहेका छन् ।