गौतमबुद्ध अन्तर्राष्ट्रिय विमानस्थल भैरहवामा अवतरणका क्रममा बुद्धएयरको जहाज चिप्लिएर धावनमार्गको किनारमा पुगेको छ । जिल्ला प्रहरी कार्यालय रुपन्देहीका प्रहरी प्रवक्ता एवं प्रहरी नायब उपरीक्षक मनोहरप्रसाद भट्टका अनुसार गएराति जहाज चिप्लिँदा जहाजको चक्काले भुइँ (माटो) छुन पुगेको थियो ।

काठमाडौंबाट गएराति ९ः३० बजे उडान भरेको ८०५ नम्बरको सो जहाजले विमानस्थलको पूर्वबाट पश्चिमतर्फ अवतरण गर्नेक्रममा चिप्लिएको हो । जहाजबाट सबै यात्रुलाई सकुशल सुरक्षित बाहिर निकालिएको छ । सो विमानमा चालकदलका सदस्यसहित ५९ यात्रु सवार रहेका बताइएको छ ।

जहाज अहिले पनि धावनमार्गमै रहेको कारण विमानस्थल बन्द रहेको प्रहरी प्रवक्ता भट्टले जानकारी दिएका छन् ।