गएराति आएको हावाहुरीले झापामा ठूलो क्षति पुऱ्याएको जिल्ला प्रहरी कार्यालय झापाले जनाएको छ ।

हावाहुरीका कारण जताततै बिजुलीका पोल ढलेका छन् भने घरका छाना उडाउनुका साथै रुखहरु समेत ढलेका छन् । क्षतिको यकिन विवरण भने आउन बाँकी रहेको बताउँदै प्रहरी कार्यालयका प्रवक्ता कृष्णबहादुर चन्दले हावाहुरीका कारण मानवीय क्षति भने नभएको जानकारी दिए ।

चारआलीको पाउपाथीभरा मन्दिरस्थित पूर्वपश्चिम राजमार्गमा सखुवाको रुख ढल्दा एउटा कारमा क्षति समेत पुगेको छ भने राजमार्गमा ढलेका रुखहरु राति नै जेसीबी लगाएर पन्छाइएको छ । चारआलीबाट बिर्तामोडतर्फ जाँदै गरेको बागमती प्रदेश ०१-०२३च ५०९३ नं को कारमा क्षति भएको प्रहरीले जनाएको छ ।

हावाहुरीले बिजुलीको पोल ढाल्दा मेचीनगरको धुलाबारी, धाइजन, र काँकरभिट्टामा विद्युत् अवरुद्ध भएको छ ।

^{_{file photo}}