प्रहरीको लागुऔषध नियन्त्रण ब्युरोले १ किलो ८८ ग्राम कोकिनसहित एक जना विदेशी नागरिकलाई पक्राउ गरेको छ । व्यूरोबाट खटिएको प्रहरी टोलीले निरन्तर निगरानी गर्दै जाने क्रममा अवैध लागु औषध कोकिनको कारोबारमा संलग्न अन्तर्राष्ट्रिय गिरोहका विदेशी नागरिकलाई लागुऔषध कोकिनसहित पक्राउ गरिएको ब्युरोका सहायक प्रवक्ता डिएसपी प्रेमबहादुर शाहीले जानकारी दिए ।

यही भदौं ३ गते कतार एयरको उडानबाट नेपाल आएका आइभरी कष्टका नागरिक वर्ष ३५ का VAMARA KONE लाई कोकिनका ६९ वटा क्याप्सुलसहित काठमाडौं २६ ठमेलको ज्याठास्थित एक होटेलबाट पक्राउ गरिएको हो । उक्त कोकिनका क्याप्सुलहरु निजले खेलौना भित्र लुकाएर राखिएको अवस्थामा बरामद गरिएको डिएसपी शाहीको भनाइ छ ।

निज VAMARA KONE ले उक्त क्याप्सुलहरु नाईजेरियाबाट निलेर ईथोपियाबाट दोहा हुँदै काठमाण्डौ आएको प्रारम्भिक अनुसन्धानको क्रममा खुल्न आएको छ । साथै निज उपर लागु औषध नियन्त्रण ऐन, २०३३ बमोजिम आवश्यक कारवाही भइरहेको छ ।