पूर्व-पश्चिम राजमार्गअन्तर्गत बाराको उनासीपुलमा यात्रुवाहक दुर्घटना हुँदा ४३ जना यात्रु घाइते भएका छन् । घाइतेमध्ये ८ जनाको अवस्था गम्भीर रहेको जनाइएको छ।

काँकडभिट्टाबाट दाङको लागि प्रस्थान गरेको ना ८ ख ११६४ नम्बरको बस गएराति अनियन्त्रित भइ पुलदेखि ८ मिटर तल खसेर पल्टिँदा बसमा सवार सबै घाइते भएका थिए । घाइतेहरुको निजगढस्थित सामुदायिक प्रसुतीगृह अस्पतालमा ३४ जना र सिटी अस्पतालमा ९ जनाको उपचार भइरहेको छ ।

उक्त बसको अगाडिको पट्टा भाँचिएर दुर्घटना भएको प्रहरीको प्रारम्भिक अनुमान रहेको र, थप अनुसन्धान भइरहेको जिल्ला प्रहरी कार्यालय बाराले जनाएको छ ।