काठमान्डौं / आज दिउसो सुर्खेतको महेलकुनामा माओवादी लडाकुले स्थानीय बासिन्दा र प्रहरीलाई कुटपिट गरेका छन्। कुटाइबाट स्थानीय क्लबका अध्यक्ष हस्तबहादुर पुन, फुटबल खेलाडी यादव खत्री र अर्का एक युवाका साथै चार प्रहरी घाइते भएका छन्। प्राप्त जानकारीअनुसार दिउसो करिब ३ बजे माओवादी सेनाको छैटौँ डिभिजनमा कार्यरत् एक लडाकुसँग स्थानीय एक युवाको झगडा भएको थियो। नजिकैको प्रहरी चौकीबाट झगडा मिलाउन गएको प्रहरीलाई शिविरबाट आएका लडाकुले लठ्ठी र ढुङ्गाले कुटेका थिए। ‘प्रहरीलाई त कपडा खोलेर बेस्सरी कुटे’, प्रत्यक्षदर्शी सिंहले भने – ‘यस्तो बिजोगको कुटाइ त मैले यसअघि कहिल्यै देखेको थिइनँ।’ अहिले घटनास्थल तनावयुक्त छ। सुर्खेतका प्रहरी प्रमुख एसपी राजु मानन्धरसहितको टोली अहिले त्यसतर्फ गइरहेको छ। घटनास्थल पुगेपछि वास्तविकता थाहा हुने मानन्धरले बताए। – मेस