गएराति काठमाडौंको गौशालास्थित होटल पशुपति भिजनमा गोली चलेको प्रहरीले जनाएको छ ।

गोली चले लगत्तै घटनास्थल पुगेको महानगरीय प्रहरी वृत, गौशालाको टोलीले गणेश लामालाई पक्राउ गरेको छ । टोलीले लामालाई एउटा पेस्तोल र ६ राउण्ड गोलीसहित पक्राउ गरिएको काठमाडौं प्रहरी परिसरले जनाएको छ ।

प्रहरीसँगको प्रारम्भिक बयानका क्रममा लामाले आफूलाई दुई युवकले गोली प्रहार गरेर भागेको दाबी गरेका छन् । प्रहरीका अनुसार गोली कसैलाई लागेको छैन ।

प्रहरीका अनुसार लामालाई नियन्त्रणमा लिएर थप अनुसन्धान थालिएको छ ।

लामा यसअघि काभ्रेको क्षेत्र नंं १ ‘ख’ बाट प्रदेशसभा सदस्यमा नेपाली कांग्रेसका लागि उम्मेदवार बनेका थिए । गणेश लामा विजय गच्छदारको आशिर्वाद प्राप्त पात्रका रुपमा समेत चिनिँदै आएका छन् ।