एक्सेल्सिया कलेज प्रधानमन्त्री कप एकदिवसीय राष्ट्रिय क्रिकेट प्रतियोगिताअन्तर्गत बिहीबार भएको खेलमा त्रिभुवन आर्मीले समूह ‘ए’बाट आफ्नो पहिलो खेलमा जित निकालेको छ । राष्ट्रिय खेलकुद परिषद्को आयोजना तथा नेपालय इन्टरनेसनलको व्यवस्थापनमा टीयू क्रिकेट मैदानमा भएको खेलमा आर्मीले प्रदेश नम्बर २ लाई ५६ रनले पराजित गरेको हो ।

टस जितेर पहिले ब्याटिङ गरेको आर्मीले इनिङको तीन बल बाँकी छँदा सबै विकेट गुमाएर २४४ रन जोडेको थियो । आर्मीका लागि मध्यक्रममा ब्याटिङ गरेका विकेटकिपर राजु रिजालले ५० रनको अर्धशतकीय इनिङ खेलेका थिए । आर्मीका लागि राजेश पुलामीमगरले ४० तथा सोमपाल कामीले पनि ४१ रनको योगदान दिए । कप्तान विनोद भण्डारीले २३ रन जोडेका थिए । त्यस्तै बलिङतर्फ दिव्यांशु मल्लिकले ३ विकेट लिँदा रसिद खान, सांसद शेख र कप्तान मेहबुब आलमले २–२ विकेट लिएका थिए ।

२४५ रनको लक्ष्य पछ्याएको प्रदेश नम्बर २ का ओपनर कुन्दन सिंह तेस्रो ओभरमा खाता नखोली आउट भएका थिए । अर्का ओपनर हरिशंकर शाह र हसिम अन्सारीले सम्हालिएर पारी उकासेका थिए । खेल ८ ओभरपछि वर्षाका कारण रोकिएको थियो । करिब १ घन्टापछि सुरु भएको खेल ४० ओभरमा छोट्याउँदै प्रदेश २ लाई २३८ रनको नयाँ लक्ष्य दिइएको थियो । तर, प्रदेश नम्बर २ ले निर्धारित ४० ओभरमा ९ विकेट गुमाएर १८२ रन समेटिएपछि आर्मीले ५६ रनले खेल आफ्नो पक्षमा पारेको थियो ।
प्रदेश २ का मध्यक्रमका कुनै पनि ब्याट्सम्यानले दोहोरो अङ्कको रन बनाउन सकेनन् । प्रदेश २ ले २७औँ ओभरमा १०९ रन बनाउँदा महत्वपूर्ण ८ विकेट गुमाइसकेको थियो । नवौँ विकेटका लागि रसिद खान र सुरज पटेलले ४३ रनको साझेदारी गरेपछि प्रदेश २ का लागि नयाँ आशा पलाएको थियो । तर, ३५औँ ओभरमा साहव आलमको बलमा क्याचआउट भए । उनले ४० बल खेलेर ३४ रन बनाएका थिए ।

अविजित खेलेका पटेल भने अर्धशतक प्रहार गर्नबाट मात्र २ रनले चुके । उनले ४८ बलमा २ छक्का र ६ चौका प्रहार गरे । बलिङतर्फ सोमपाल कामीले ३ विकेट लिँदा सुशान भारी, सागर पुन र साहव आलमले २–२ विकेट लिए । सोमपाल खेलको म्यान अफ द म्याच चुनिएका थिए ।