जुन पतिले उच्च शिक्षा दिलाएर पत्नीलाई राजदूतको ओहोदासम्म पुऱ्याउन सहयोग गर्छन्, आफ्नो ‘हाइट’ बढेपछि तिनै पत्नीले पतिलाई सडकको बास गराउँछिन् भने त्यस्ता पत्नीलाई के भन्ने ? नेपालका लागि पाकिस्तानमा राजदूत रहेकी सेवा अधिकारी लम्सालको व्यवहारले यस्तै प्रश्न खडा गरेको छ । लम्सालले राजदूत बनिसकेपछि उमेर ढल्किसकेका पति प्रदीप अधिकारीलाई परित्याग मात्र गरिनन् शक्तिको आडमा सबै सम्पत्ति हत्याएर उनलाई सडकको बास गराइदिएकी छिन् ।

आफूले जीवनभर दुःख गरेर काठमाडौंको गैरीगाउँ (तिनकुनेनजिकै) मा बनाएको घर, इटहरीको मूल्यवान जमिन र बैंकमा सञ्चित गरिएको सम्पूर्ण रकम पत्नीबाट खोसिएपछि प्रदीप अधिकारी यतिबेला मीनभवनस्थित आफन्तको घरमा शरण लिइरहेका छन् । तीन छोरीका पिता अधिकारी पहिले गृह मन्त्रालयमा जागिरे थिए, गृहबाट उद्योग मन्त्रालयमा सरुवा गरिएका उनी कम्पनी रजिस्ट्रारको कार्यालयमा सेवारत थिए । त्यहीँ सेवारत रहँदा कसैले षड्यन्त्रमूलक ढङ्गले फसाइदिएपछि अधिकारी सेवामुक्त भएको बताइन्छ ।

आफू निजामती सेवामा रहँदा कृषि विकास बैंकको चौथो तहमा जागिरे रहेकी पत्नी सेवा लम्साललाई आफैँले उच्च शिक्षा दिलाएर निजामती सेवामा प्रवेश गर्न प्रदीपले सहयोग गरेका थिए । परराष्ट्र मन्त्रालयअन्तर्गत रहेकी लम्सालले दुई वर्षअघि राजदूत नियुक्त हुनुभन्दा केही समयअघिदेखि नै पतिसँग विभिन्न निहुँ झिकेर विवाद र झगडा गर्न थालेकी थिइन् । पतिले जागिर गुमाएपछि फरक व्यवहार गर्न शुरु गरेकी उनले आफ्नो ओहोदा बढ्दै गएपछि शयन कक्षसमेत पतिसँग अलग गरेकी थिइन् । राजदूत नियुक्त भएपछि सेवामा भारी परिवर्तन देखापरेको थियो, यसै क्रममा बुढेसकालका पतिलाई गत असार २० गते उनले कानुनी तवरमै छोडिदिएकी छिन् ।

यसरी पतिसँग सम्बन्धविच्छेद गरिदिँदा सेवाले प्रदीप अधिकारी पनि बाँच्न पाउनुपर्छ भन्ने सोचिनन् । घर, जग्गा र सम्पूर्ण नगद आफैँसँग राखेर उनले पतिलाई घरबाट निकालिदिइन् । सँगै जिउने, सँगै मर्ने वाचा गरेकी पत्नीले ठूलो ओहोदा भेट्टाएपछि यतिसम्म गर्लिन् भन्ने सपनामा पनि नसोचेका प्रदीप अधिकारीसँग यतिबेला वास बस्नका लागि घर, खेतीपाती गर्नका निम्ति जग्गाजमिन त रहेन नै, जागिर खानका लागि उमेर र अन्य केही काम गर्नका निम्ति जाँगर पनि छैन । यसरी रित्याइएका प्रदीपले बाँकी जिन्दगी कसरी गुजार्ने हुन्, आफन्त तथा नातेदारहरूका निम्ति चिन्ताको विषय बनेको छ ।