काभे्रपलाञ्चोकमा सञ्चालितमध्ये आठ हजार ५५० सवारीसाधन नियम उल्लंघन गरेबापत चालू आर्थिक वर्षको पहिलो तीन महिनामा कारबाहीमा परेका छन् ।

जिल्ला ट्राफिक प्रहरी कार्यालय बनेपाका प्रमुख निशेष चापागाईंका अनुसार सवारी नियम उल्लंघन गरेबापत विभिन्न सवारीसाधनलाई कारबाही गर्दा बितेको तीन महिनाको अवधिमा रु. ५० लाख ५४ हजार राजस्व संकलन भएको छ । उनले भने, ‘यो राजस्व अघिल्लो आवको पहिलो तीन महिनाभन्दा झन्डै दोब्बर हो ।’ ट्राफिक प्रहरी कार्यालयले गत साउन महिनामा दुई हजार २ सय सवारीलाई कारबाही गरी १३ लाख दुई हजार, भदौमा चार हजार ५० वटा सवारी कारबाहीबाट रु. २४ लाख ६८ हजार ५ सय र असोजमा दुई हजार १ सय सवारी कारबाहीबाट १२ लाख ८३ हजार ५ सय राजस्व संकलन गरेको हो ।

गत वर्षको तुलनामा अरनिको राजमार्गअन्तर्गत काभे्रपलाञ्चोक जिल्ला हुँदै मध्यपहाडी जिल्ला तथा बिपी राजमार्गबाट पूर्व जाने सवारी चाप बढेसँगै सवारी नियम उल्लंघन गर्ने सवारीको संख्या बढेको र राजस्वसमेत वृद्धि भएको प्रमुख चापागाईंले बताए ।