युरोपियन विमान कम्पनी एअरबसमा एक हजार ६०० रोजगारीका अवसर कटौतीको विषयलाई लिएर बिहीबार स्पेनभरी हजारौँ एयरबस कर्मचारीहरूले प्रदर्शन गरेका छन् ।

यद्यपि सयौँ रोजगारी कटौती गर्ने घोषणा महामारी सुरूभएपछि फेब्रुअरीमा पहिलो पटक घोषणा गरिएको थियो । तर कोरोना भाइरस महामारीले कम्पनी निकै प्रभावित बनेपछि जुनको अन्त्यमा घटाउने पदहरूको सङ्ख्या दोब्बर हुने घोषणा गरिएको छ ।

स्पेनको राजधानी म्याड्रिडको दक्षिणी क्षेत्रमा रहेको गेटाफेमा मास्क लगाएका सयौँ प्रदर्शनकारीहरूले विमानको कार्यालय र स्थानीय शहरको हलको मध्य क्षेत्रमा प्रदर्शन गरेका थिए ।

उनीहरूले कसैले पनि जागिर नछोड्ने पद खारेज गर्न नपाइने भावका नाराहरू लेखिएका ब्यानरसहित जुलुसमा सहभागी बनेका थिए ।

जुनको अन्त्यमा एयरबसले विश्वभर आफ्ना १५ हजार कर्मचारीलाई कटौती गर्ने योजना बनाइरहेको बताएको थियो भने यसमध्ये स्पेनमा ८८९ कर्मचारी हटाउने एअरबसले जनाएको छ ।

एअरबसले महामारीको प्रतिक्रियास्वरूप कूल जनशक्तिको ११ प्रतिशत कर्मचारीलाई घटाउन लागेको बताउँदै आएको छ ।

“मलाई थाहा छ यो गाह्रो अवस्था हो तर एयरबस जस्ता प्रसिद्ध कम्पनीबाट कर्मचारीमाथि यस किसिमको निर्मम निर्णय आउँछ भन्ने मलाई लागेको थिएन,” एक एअरबसका ३६ वर्षीय इञ्जिनियर जेभियर पयाले भनेका छन् ।

एरोस्पेस क्षेत्रका लागि राज्य सहायताको माग गरिरहेका श्रमिक आयोग युनियनका अगस्टिन मारिनले भने, ‘महामारीका कारण सिर्जना भएको आर्थिक समस्याका कारण कसरी रोजगार र उच्चस्तरीय उत्पादन प्रणालीलाई प्रभावित पार्छ भन्ने कुरा हामी बुझ्न सक्दैनौँ ।’

एयरबसले स्पेनभरि करिब १२ बजार ३०० जनालाई रोजगार प्रदान गरेको छ तर युनियनका प्रतिनिधिहरूले एरोस्पेस कम्पनीले प्रत्यक्ष तथ अप्रत्यक्ष रूपमा स्पेनमा एक लाख व्यक्तिलाई रोजगारी दिएको दाबी गरेका छन् ।

एएयरबसका प्रवक्तालाई एएफपीले जनाएअनुसार २ जुलाईदेखि युनियनहरूसँग वार्ता सुरु भएको र समाधानहरू खोज्ने पहल भइरहेको तथा महामारीबाट थला परेको उद्योगलाई जोगाउँदै न्यूनतम रोजगारी कटौतीका लागि सहमति निकालिने छ ।