दक्षिण अफ्रिकी खेलाडी एबी डिविलियर्स इन्डियन प्रिमियर लीग (आईपीएल) मा सय करोडभन्दा बढी कमाउने पहिलो विदेशी खेलाडी बनेका छन् । आईपीएलको १४औँ संस्करणमा पनि रोयल च्यालेञ्च बेङ्लोरले आफ्ना प्रमुख १० खेलाडीहरूमा डिविलियर्सलाई चयन गरेपछि उनले यो उपलब्धि हासिल गरेका हुन् । डिविलियर्स एउटा संस्करण खेलेको ११ करोड भारतीय रूपैयाँ लिने गरेका छन् । डिविलियर्सले अहिलेसम्म १०२.५ करोड कमाइसकेका छन् ।

डिविलियर्स आइपीएलको इतिहासमा सबैभन्दा सफल ब्याट्सम्यान हुन् । उनले आइपीएलमा १६९ वटा म्याच खेल्दै ४० भन्दा बढीको औसतले ४ हजार ८ सय ४९ रन बनाएका छन् । जसमा तीन सतक र ३८ अर्धसतक समेत रहेका छन् । यो बाहेक आईपीएलमा क्रिस गेलपछि दोश्रो सबैभन्दा बढी छक्का प्रहार गर्ने खेलाडीको नाम डिविलियर्सकै छ । डिविलियर्सले सन् २०२० को आईपीएलको संस्करणमा उत्कृष्ट प्रदर्शन गर्दै १५८.७४ को स्टाईक रेटका साथ ४ सय ४५ रन बनाएका थिए । आफ्नो टीमलाई अन्तिम चारमा पु¥याए पनि उपाधि जिताउन भने असफल भएका थिए ।

डिविलियर्स भन्दा अघि चारजना भारतीय खेलाडीले सय करोडभन्दा बढी कमाएका छन् । ती भारतीय खेलाडीहरूमा महेन्द्र सिंह धोनी, विराट कोहली, रोहित शर्मा र सुरेश रैना रहेका छन् ।