सरकारद्वारा घोषित आसन्न प्रतिनिधिसभा सदस्य निर्वाचन तोकिएकै मितिमा सम्पन्न गर्ने आयोगको अर्जुनदृष्टि रहेको प्रमुख निर्वाचन आयुक्त दिनेशकुमार थपलियाले बताएका छन् ।

पाँचौ निर्वाचन दिवसका अवसरमा निर्वाचन आयोगमा शुक्रबार आयोजित कार्यक्रममा प्रमुख निर्वाचन आयुक्त थपलियाले इतिहासको विरासत र साखलाई खुम्चन नदिइ उत्कृष्ट निर्वाचन व्यवस्थापन निकायको रुपमा आयोगलाई पहिचान दिलाउन कृतसङ्कल्पित भइ निरन्तर प्रयासरत रहने प्रतिवद्वता व्यक्त गरे ।

आयोगले विक्रम सम्वत् २०१५ मा पहिलो पटक मतदान भएको दिनलाई स्मरण गर्दै सम्वत् २०७३ सालदेखि प्रत्येक वर्षको फागुन ७ गते निर्वाचन दिवस मनाउँदै आएको छ ।

यस वर्षको निर्वाचन दिवसको मूल नारा ‘निर्वाचनमा सबै, सधैँ, सँगै’ भन्ने रहेको थियो ।

सरकारले आगामी वैशाख १७ र २७ गते गरी दुई चरणमा निर्वाचन गर्ने घोषणा गरेअनुरुप आयोग आन्तरिक तयारीमा तीव्र रुपमा जुटिरहेको छ ।

राजनीतिक दलले निर्वाचनका लागि उपयुक्त वातावरण तयार गर्नुपर्ने जनाउँदै प्रमुख आयुक्त थपलियाले भने- ‘स्वच्छ, स्वतन्त्र र निष्पक्ष रुपमा निर्वाचन सम्पन्न गर्न/गराउन प्राविधिक तथा व्यवस्थापकीय रुपमा आयोगसक्षम छ, हुन्छ ।’

आयोगका पदाधिकारी तथा सचिवालयका कर्मचारी आयोगको सभाहलमा र जिल्ला निर्वाचन कार्यालयका कर्मचारी भर्चुअल माध्यमबाट सहभागी भई आयोजना गरिएको उक्त कार्यक्रमको प्रमुख आयुक्तले डिजिटल प्रविधिबाट उद्घाटन गरेका थिए ।

सो अवसरमा निर्वाचन आयुक्त नरेन्द्र दाहाल र डा. जानकीकुमारी तुलाधरले आसन्न निर्वाचन सम्पन्न गर्न सबै राजनीतिक दल, मतदाता, सरोकारवाला र कर्मचारीलाई आ–आफ्नो भूमिका र जिम्मेवारी निर्वाहका लार्गि क्रियाशीलता दर्शाउनु पर्ने आह्वान गरे ।

निर्वाचन दिवसकै अवसरमा ‘निर्वाचन’ विषयमा आयोजित कविता वाचन प्रतियोगिता उपसचिव कोमलप्रसाद धमला प्रथम, जिल्ला निर्वाचन कार्यालयका अधिकृत टेकबहादुर कोइराला दोश्रो र जिल्ला निर्वाचन कार्यालयअधिकृत कोपिला राई तेश्रो घोषित भए ।

समारोहमा २० वर्ष वा सोभन्दा बढी अवधि सेवा गरेका १४ कर्मचारीलाई प्रशंसापत्र र नगद पुरस्कारबाट सम्मानित तथा निर्वाचन सञ्चालन तथा व्यवस्थापनमा उत्कृष्ट कार्यसम्पादन गर्ने आयोग र मातहत कार्यालयका सात जना कर्मचारीलाई ‘उत्कृष्ट कर्मचारी पुरस्कार’ सहित प्रशंसा गरिएको थियो ।