नेपाल ब्याडमिन्टन सङ्घको आयोजनमा योनेक्स सनराइज एनबिए कप राष्ट्रिय ब्याडमिन्टन च्याम्पियनसिप चैत्र १५ देखि १८ गतेसम्म आयोजना हुने भएको छ ।

दशरथ रङ्गशालास्थित कभर्डहलमा आयोजना हुने च्याम्पियनसीपमा पुरुष तथा महिला एकल र युगल, मिश्रीत युगल, ब्वाइज तथा गल्र्स यु–१७ र भेट्रान्स युगल ४५ गरी ८ विधामा प्रतिस्पर्धा हुने नेपाल ब्याडमिन्टन सङ्घले जनाएको छ ।

र्‍याङ्किङ प्रतियोगिता समेत रहेको च्याम्पियनसीपमा नेपाल ब्याडमिन्टन सङ्घसँग आवद्ध जिल्ला ब्याडमिन्टन सङ्घ र आवद्ध हुन बाँकी जिल्ला, विभागीय टोली नेपाली सेनाको त्रिभुवन आर्मी क्लब, नेपाल प्रहरीको पुलिस क्लब र सशस्त्र प्रहरीबलको एपिएफल क्बलका खेलाडीहरूले सहभागिता जनाउन पाउने छन् ।

करिव २७ लाखको अनुमानित बजेट रहेको च्याम्पियनसीपमा पुरुष तथा महिला एकलका शीर्ष तीन विजेताले नगद ५० हजार, २५ हजार र १२ हजार ५ सय सहित मेडल र प्रमाण पत्र प्राप्त गर्नेछन् । यसतै युगल तर्फका शिर्ष तीनले नगद ३० हजार, १५ हजार र ७ हजार ५ सय सहित मेडल र प्रमाण पत्र प्राप्त गर्नेछन् । यस्तै यु–१७ ब्वाइज तथा गल्र्सका शीर्ष तीन विजयीले नगद २० हजार, १० हजार र ५ हजार, मेडल र प्रमाण पत्र प्राप्त गर्नेछन् ।

विश्व ब्याडमिन्टन महासङ्घको नियमानुसार खेलाइने च्याम्पियनसीपका लागि प्रत्येक जिल्लालाई पुरुष तथा महिला शीर्ष १६ बरियता बाहेक २ पुरुष र २ महिला कोटा प्रदान गरिएको छ । यस्तै यु १७ तर्फ पनि प्रत्येक जिल्लाका लागि २ पुरुष र २ महिला खेलाडीको कोटा प्रदान गरिएको छ ।

त्यस्तै प्रत्येक टिममा एक जना प्रशिक्षक र एक ब्यवस्थापक रहने छन् । कोटामा परेका प्रत्येक खेलाडी, प्रशिक्षक र ब्यवस्थापकले खान बस्नका लागि नगद ८ सय सुविधा प्राप्त गर्ने छन् । कोटा भन्दा बाहेकका खेलाडी, प्रशिक्षक तथा ब्यवस्थापकले खान बस्ने ब्यवस्था आफू स्वयम्ले गर्नु पर्नेछ ।

त्यस्तै, प्रथम खुल्ला साइनो मेयर कप ब्याडमिन्टन प्रतियोगिता २०७७ को उपाधि सिल्क ग्रुपका प्रिन्स दाहाल र नेपाली सेनाको त्रिभुवन आर्मी क्लबकी अनुमाया राईले जितेका छन् ।

पुरुष एकलतर्फ सिल्क ग्रुपका प्रिन्स दाहाल र एपीएफका दिपेश धामीबीच उपाधिका लागि भएको भीडन्तमा प्रिन्सले बाजी मारेका हुन् । उनले एपीएफका दिपेश धामीमाथि २३–२१, २१–१८ को जित निकालेका थिए । विजयी खेलाडीले ५० हजार र उपविजेताले ३० हजार मेडल र प्रमाण पत्र प्राप्त गरे
त्यस्तै महिला एकल तर्फको प्रतिस्पर्धामा आफ्नै क्लबकी अमिता गिरीलाई २१–१०, २१–१७ को सोझो सेटमा पराजित गर्दै राईले उपाधि हात पारिन । विजेता राईले ३० हजार र उपविजेता गिरीले नगद १५ हजार, मेडल र प्रमाण पत्र प्राप्त गरे । तेश्रो स्थानमा रहेका एपिएफकी शोभा गौचन र धादिङकी तारा आले प्रत्येकले नगद ७ हजार ५ सय मेडल र प्रमाण पत्र प्राप्त गरे ।

त्यस्तै पुरुष युगलतर्फ हिमालयन क्लबका विशाल बस्नेत र झापाका प्रनिश सिंह ठकुरीको जोडीले आयोजक साईनोका अभिषेक बोश र सुजन थापाको जोडीलाई पराजित गर्दै ५० हजार प्राप्त गरे भने उपबिजेता जोडीले नगद ३० हजार चित्त बुझाए ।

पुरुष भेट्रान ४५ तर्फ जेष्ट ब्याडमिन्टन एकेडेमीका श्याम पराजुली र नविन बाबु श्रेष्ठको जोडी बिजयी भयो । विजयी खेलाडीहरुले ४० हजार सहित ट्रफी, मेडल र प्रमाण पत्र प्राप्त गरे । पुरुष युगल बीतर्फको प्रतिस्पर्धामा सूर्यदर्शनका दीपक राना र सञ्जय श्रेष्ठको जोडीले गण्डकी ब्याडमिन्टन क्लबका तिलक छन्त्याल र हिरा राईको जोडीलाई पराजित गर्दै ट्रफी उचाले । पुरुष सी तर्फको प्रतिस्पर्धामा टोखा युथ क्लबका क्षितीज खनाल र अमन महर्जनको जोडीले बाजी मारेका थिए ।

विजयी खेलाडीहरुलाई तारकेश्वर नगरपालिकाका मेयर रामेश्वर फुँयाल, नेपाल ब्याडमिन्टन संघका अध्यक्ष रामजी बहादुर श्रेष्ठ, उपाध्यक्ष एवं राष्ट्रिय खेलकुद परिषदका सदस्य सुभाष श्रेष्ठ, महासचिव बिरेन्द्र श्रेष्ठ लगायतले पुरस्कार वितरण गरेका थिए ।

पाँच दिनसम्म सञ्चालन भएको प्रतियोगितामा पुरुष एकल, महिला एकल, पुरुष युगल (राष्ट्रिय बरियतामा एकल र युगलमा उच्च २० मा रहेका बाहेक) भेट्रान्स (४५ वर्षमाथि) बी र सी लेबल गरी कुल ६ विधामा १९७ खेलाडीहरुले प्रतिस्पर्धा गरेका थिए ।

पुरस्कार वितरण कार्यक्रमका दौरान विश्व ब्याडमिन्टन महासंघको जुनियर १९ तर्फ तेश्रो स्थानमा पुग्न सफल भएका प्रिन्स दाहाललाई सम्मान गरिएको थियो । दाहाललाई तारकेश्वर नगरपालिकाका मेयर रामेश्वर फुँयालले प्रशंसा पत्र प्रदान गरे ।