भारतका स्वास्थ्य एवम् परिवार कल्याण मन्त्री डा. मनसुख मण्डावियाले रक्सौल बिहार)मा राष्ट्रिय खाद्य प्रयोगशालाको उद्घाटन गरेका छन् । नेपाल सरकारका कृषि तथा पशुपन्छी विकासमन्त्री महेन्द्र राय यादवको उपस्थितिमा आइतबार (२२ जेष्ठ) उक्त प्रयोगशाला उद्घाटन गरिएको हो ।

सम्बद्ध पक्षले जनाएअनुसार रक्सौलस्थित भारतीय खाद्य संरक्षा एवम् मानक प्राधिकरण (एफएसएसएआई) द्वारा स्थापित राष्ट्रिय खाद्य प्रयोगशाला भारत प्रवेश गर्ने खाद्यान्न नमुनाहरूको परीक्षण गर्नका लागि उन्नत सुविधा र पूर्वाधारहरूले सुसज्जित आधुनिक प्रयोगशाला हो । यस प्रयोगशालाले नेपालको खाद्यान्न र कृषि निर्यातको नमुना परीक्षणमा लाग्ने समयको बचत गरी भारत र नेपालबीचको द्विपक्षीय व्यापार बढाउन सहयोग गर्ने बताइएको छ ।

हाल नेपालबाट भारततर्फ निर्यात गरिने खाद्य नमुनाहरूको परीक्षणका लागि दिल्ली वा कोलकाता पठाउनुपर्ने अवस्था रहेको छ ।

लामो समयदेखि नेपाली व्यवसायीहरूले रक्सौलमा स्तरोन्नत खाद्य प्रयोगशालाको निर्माणका लागि अनुरोध गर्दै आएका थिए, जो अहिले आएर पूरा भएको छ ।

यस खाद्य प्रयोगशालाको निर्माण ‘छिमेकी पहिलो’ नीतिअनुरुप नेपालसँग कनेक्टिभिटी, व्यापार तथा सीमा पूर्वाधार सुधार गर्ने भारतीय प्रतिबद्घताको अर्को प्रतिबिम्बको रूपमा रहेको भारतीय पक्षको दाबी छ ।