• ^{_{विशेष प्रतिनिधि, टोकियो (जापान)}}

जापानका जनताले दोस्रो विश्वयुद्ध अन्त्य भएको ७७औँ वर्षगाँठ मनाइरहेका छन् । अगस्त १५, १९४५ मा मानिसहरू सम्राटको सन्देश सुन्न रेडियो वरिपरि भेला भएका थिए, जुन एतिहासिक सम्बोधनमा उनले जापानले आत्मसमर्पण गरेको घोषणा गरे ।

उक्त युद्धमा लाखौँ जापानीहरू मारिए । सोमबार उनीहरुको सम्झनामा जापान सरकारले ७७औँ युद्धसमाप्ति कार्यक्रमको आयोजना गरेको हो ।

टोकियोमा भएको वार्षिक कार्यक्रममा करिब १ हजार मानिस सहभागी थिए । यस वर्ष सहभागीहरूको संख्या कोरोना भाइरस उपायको रूपमा घटाइएको थियो ।

कार्यक्रममा द्वन्द्वमा ज्यान गुमाएकाहरुको सम्झनामा एक क्षण मौनधारण गरियो ।

दोस्रो विश्वयुद्धमा ज्यान गुमाएका मध्ये २० लाख भन्दा बढी तत्कालिन इम्पेरियल जापानी सेनासँग सम्बन्धित थिए र लगभग आठ लाख आमनागरिक थिए ।

सम्राट नारुहितो र महारानी मासाको स्मृति कार्यक्रममा सहभागी भएका थिए ।

सम्राट नारुहितोले कार्यक्रममा सम्बोधन गर्दै ‘युद्धपछिको शान्तिको लामो अवधिलाई फर्केर हेर्दा, हाम्रो विगतलाई प्रतिबिम्बित गर्दै र गहिरो पश्चातापको भावनालाई मनमा राख्दै, म दृढतापूर्वक आशा गर्दछु कि युद्धको विनाश फेरि कहिल्यै दोहोरिने छैन । अब म युद्धको मैदान र अन्य ठाउँमा युद्धमा ज्यान गुमाउने सबैलाई मेरो हार्दिक श्रद्धाञ्जली अर्पण गर्दछु र विश्व शान्ति र हाम्रो देशको निरन्तर विकासको लागि प्रार्थना गर्दछु ।’

प्रधानमन्त्री किशिदा फुमियोले पनि सम्बोधन गर्दै जापान शान्ति र समृद्धिका लागि प्रतिबद्ध रहेको बताए ।

उनले भने, ‘यस संसारमा अझै पनि द्वन्द्व कायमै छ, तर हाम्रो राष्ट्रले शान्तिका लागि सक्रिय योगदानको झण्डामुनि विश्वले सामना गरिरहेका विभिन्न चुनौतीहरूको समाधान गर्न विश्व समुदायसँग प्रतिबद्ध भएर काम गर्नेछ ।’

सोमबारको समारोहमा सहभागी भएका युद्धका मृतकका आफन्तमध्ये तीन चौथाइभन्दा बढीको उमेर ७० वर्ष नाघेको छ ।

तीमध्ये एक ८३ वर्षीय ओत्सुकी केनिची हुन् । उनका बुबाले चीनमा लड्न छोडे जब उनकी आमा उनि पेटमा रहँदा गर्भवती भइन् । केनिचीको जन्म भएको थाहा नपाएरै उनको बुबाको मृत्यु भयो ।

ओत्सुकीले भने, ‘विश्व अझै पनि द्वन्द्वले ग्रसित छ, रुसले युक्रेनमा गरेको आक्रमणजस्तै । उनीहरूले हामीले जस्तै हरेक दिन परिवारले आफ्ना प्रियजन गुमाउने गरेका छन् । संसारमा जतिसक्दो चाँडो शान्ति कायम होस् भन्ने हाम्रो पूर्ण आशा छ ।’

युद्धमा परी ज्यान गुमाएकाहरुको सम्झना र शान्तिको प्रतिबिम्बित गर्न जापानभर सोमबार दिनभर विभिन्न कार्यक्रमहरु भइरहेका छन् ।