सुदन किराँतीविरूद्ध उजुरी

सुदन किराँतीविरूद्ध उजुरी


संस्कृति, पर्यटन तथा नागरिक उड्डयनमन्त्री सुदन किराँतीविरूद्ध अख्तियार दुरुपयोग अनुसन्धान आयोगमा उजुरी परेको छ । C–०६३४४१ (०८०-२-५) दर्ता नम्बर रहेको उजुरीमा बैठकमै भाग नलिएको मितिको समेत किरातीले बैठक भत्ता बुझेको उल्लेख गरिएको छ ।

प्रज्ञा प्रतिष्ठानमा रिक्त रहेका प्राज्ञहरूको पदपूर्तिका निम्ति प्रधानमन्त्रीलाई नाम सिफारिस गर्न गठित समितिमा राई रहेको, तर उनी राजधानीबाहिर रहेको समयमा समेत बैठक बोलाएको भनी निर्णयपुस्तिका प्रमाणित गरेको र भत्ता बुझेको ब्यहोरा उजुरीमा उल्लेख छ ।

गत फागुन १ र २ गते मन्त्री राई पूर्वाञ्चलतिर भ्रमणमा गएका थिए । फागुन २ गते नेपाल प्रज्ञा प्रतिष्ठान, नेपाल ललितकला प्रतिष्ठान र नेपाल सङ्गीत तथा नाट्य प्रज्ञा प्रतिष्ठानमा प्राज्ञसभा गठन भएको थियो । यसरी मन्त्री उपस्थित नभएको समयमा बैठक बसेको र प्राज्ञसभा गठन भएको भनी प्रधानमन्त्रीलाई झुक्क्याएको ब्यहोरा पनि उजुरीमा लेखिएको छ ।