सेनेगलको नौसेनाले युरोप जाने ६०० भन्दा बढी आप्रवासीलाई देशको तटीय क्षेत्रमा रोकेको छ । नौसेनाले सामाजिक सञ्जालमा जानकारी गराएअनुसार ‘शनिबार आफ्नो एउटा गस्ती डुङ्गाले २६ महिला र १३ नाबालकसहित २६२ यात्रु बोकेका दुईवटा डुङ्गा नियन्त्रणमा लिएको हो । नौसेनाले शुक्रबार २७२ र एक दिनअघि ७१ यात्रु बोकेको डुङ्गा रोकेपछि तीन दिनमा कूल ६०५ जना आप्रवासी रोकिएका छन् ।

सेनेगलको नौसेनाले हालैका हप्ताहरूमा अवैध आप्रवासीहरूलाई लक्षित गरी बोर्डिङ र उद्धार कार्यलाई तीव्र बनाएको छ ।

सेनेगलले जुलाई १ देखि हालसम्म एक हजार ९५५ आप्रवासीलाई रोकेको सामाजिक सञ्जालमा प्रकाशित जानकारीमा उल्लेख छ ।

जुलाईको अन्त्यमा, सेनेगलको सरकारले पश्चिम अफ्रिकी देशबाट अनियमित आप्रवासनलाई घरेलु र बाह्य वित्तपोषणको साथ सामना गर्न १० वर्षको योजना प्रस्तुत गरेको थियो ।

पाँच खम्बे योजनामा सीमा व्यवस्थापन र तस्करहरूविरुद्ध कानून प्रवर्तन उपायहरू सुदृढ पार्ने र सेनेगलमा आप्रवासीहरूलाई स्वदेश फर्काउन र पुनः एकीकृत गर्न मद्दत पुऱ्याउने समावेश छ ।

राम्रो जीवनको आशामा हजारौं अफ्रिकीहरू यात्रामा सयौँको ज्यान जाने जोखिमको बावजुद हरेक वर्ष एटलान्टिक क्षेत्र पार गरेर युरोप पुग्ने प्रयास गर्छन् ।
उनीहरू सामान्य डुङ्गा वा तस्करहरूले उपलब्ध गराएको मोटरचालित डुङ्गामा क्यानरी, स्पेनी द्वीपसमूह र युरोपको प्रवेशद्वारमा रहेका धेरै भूमि लक्ष्य बनाएर यात्रा गर्छन् ।

स्पेनको गृह मन्त्रालयका अनुसार जनवरी १ देखि अगष्ट ३१ को बीचमा यी टापुहरूमा एघार हजार ४ सय ३९ आप्रवासी आगमन भएका छन्, जुन सन् २०२२ को सोही अवधिको तुलनामा ७.५ प्रतिशतले बढी हो ।

यो अवधिमा भएको वृद्धि सन् २०१८ पछि अहिलेसम्मकै सबैभन्दा बढी र सम्भवतः सन् २००६ यताकै सबैभन्दा बढी हो ।

सन् २०२३ को सुरुदेखि अहिलेसम्म १४० आप्रवासीको मृत्यु भएको वा बेपत्ता भएको अन्तर्राष्ट्रिय आप्रवासन सङ्गठन (आईओएम) ले सेप्टेम्बरको सुरुमा प्राप्त गरेको तथ्याङ्कले देखाएको छ ।