यतिबेला मुलुकमा कोरोना भाइरसको सङ्क्रमण पाइएको छैन, तर सङ्क्रमणविरुद्धको लाखौँ खोप नेपाल आएको छ । कोरोना सङ्क्रमण नभए पनि स्वास्थ्य तथा जनसङ्ख्या मन्त्रालयले दीर्घरोगी, विदेश जानका लागि अझै पनि केही मानिसलाई खोप आवश्यक भएको भन्दै थप खोप ल्याएको हो ।

स्वास्थ्य सेवा विभागको आपूर्ति व्यवस्थापन शाखाका प्रमुख डा. सुरेन्द्र चौरसियाका अनुसार तीन लाख ७७ हजार फाइजर खोप ल्याइएको छ । खोप कोभ्याक्समार्फत बुस्टर डोजका लागि ल्याइएको हो । यसअघि गत मङ्सिर ८ गते तीन लाख ७३ हजार खोप आएको थियो ।

कोभ्याक्सले कूल सात लाख ५० हजार मात्रा खोप बुस्टर डोजका लागि उपलब्ध गराएको हो । अहिले पनि प्रदेश तहबाट बुस्टर डोजका लागि खोपको माग हुने गरेको र पछिल्लो खेप आएका ती खोपलाई प्रदेशमा पठाइने बताइएको छ ।

ज्ञातव्य छ, सरकारले अहिलेसम्म ६ करोड ६९ लाख ८३ हजार दुई सय ७० मात्रा खोप ल्याइसकेको छ भने नेपालमा अहिलेसम्म कोरोना भाइरस सङ्क्रमणबाट ११ लाख ५७ हजार पाँच सय २२ सङ्क्रमित र १२ हजार ३१ जनाको निधन भइसकेको सरकारी तथ्यांक छ ।