ब्यूटीपार्लरमा रोजगारीको बहानामा जबर्जस्ती यौनशोषण !

ब्यूटीपार्लरमा रोजगारीको बहानामा जबर्जस्ती यौनशोषण !


बालिकासहित तीन युवतीको उद्धार

रोजगारीको नाममा काठमाडौंमै बालिका तथा युवतीहरु बेचविखन भएको घटना बाहिर आएको छ ।

काठमाडौं महानगरपालका-९ रातोपुलस्थित ‘नुवाकोट ब्यूटीपार्लर एण्ड स्पा सेन्टर’मा काम गर्ने युवतीलाई रोजगारीको नाममा जबर्जस्ती वेश्यावृत्तिमा लगाइ यौनशोषण गर्ने गरेको पाइएको प्रहरीको मानव बेचविखन अनुसन्धान ब्यूरोले जनाएको छ ।

उक्त सूचनाका आधारमा ब्यूरोबाट खटिएको टोलीले नाबालिकासहित तीन जना युवतीलाई उद्धार गर्नुका साथै उक्त स्पाका सञ्चालक दिनेश पौडेललाई पक्राउ गरी अनुसन्धान थालेको ब्यूरोले सोमबार सार्वजनिक गरेको छ । उनीमाथि मानव बेचविखन तथा ओसारपसार मुद्दामा आवश्यक अनुसन्धान भइरहेको ब्यूरोका प्रहरी उपरीक्षक कृष्णप्रसाद पङ्गेनीले बताएका छन् ।

अनुसन्धानका क्रममा आर्थिक अवस्था कमजोर भएका, ग्रामीण भेगका कम पढे लेखेका युवतीलाई आकर्षक तलब सुविधा दिने प्रलोभनमा पारी स्पा सेन्टरमा काम गर्न बोलाउने गरेको खुल्न आएको छ । पक्राउ प्रतिवादीले काठमाडौंको रातो पुल र एअरपोर्टनजिकै दुई वटा स्पा सेन्टर खोलेको पाइएको तथा उक्त स्पामा काम गर्ने युवतीलाई आलोपालो एक ठाउँबाट अर्को ठाउँमा पठाउने गरेको पनि अनुसन्धानमा फेला परेको ब्यूरोले जनाएको छ ।

स्पा सेन्टरमा काम गर्ने युवतीलाई मसाजका साथै शारीरिक सम्पर्क राख्न दबाब दिने गरेको तथा नमानेमा शारीरिक तथा मानसिक यातनासमेत दिने गरेको खुलेको पङ्गेनीको भनाइ छ । पुरुषसँग अश्लील क्रियाकलाप गरेको फोटो, भिडियो आफूसँग सुरक्षित रहेको र भने अनुसार नगरेमा÷नमानेमा सामाजिक सञ्जालमार्फत आफन्तलाई पठाइदिने भनी डरत्रासमा पार्ने गरेको पनि खुलेको प्रहरीले जनाएको छ ।

उद्धार भएका युवतीमध्ये दुई जना नाबालिका रहेका छन् । युवतीलाई जबर्जस्ती यौन व्यवसायमा लगाइ निज स्पा सेन्टरका सञ्चालक पौडेलले आर्थिक लाभ लिने गरेको खुल्न आएको पनि प्रहरीले जनाएको छ ।