नागरिकता कैफियतसम्बन्धी मुद्धाको अनुसन्धानका लागि जिल्ला प्रहरी कार्यालय धनुषाको हिरासतमा रहेका कान्तिपुर मिडिया ग्रुपका अध्यक्ष कैलाश सिरोहिया हिरासतमुक्त भएका छन् । धनुषा जिल्ला सरकारी वकिलको कार्यालयको स्वीकृति र जिल्ला प्रहरी कार्यालय धनुषाले पठाएको पत्रका आधारमा ललितपुर प्रहरीले सिरोहियालाई नौ दिनपछि बुधबार (१६ जेठ) हाजिरी जमानीमा हिरासतबाट मुक्त गरेको हो ।

मुटुसम्बन्धी समस्या भएको भन्दै सिरोहियालाई उपचारका लागि मंगलबार दिउँसो काठमाडौं ल्याइ ललितपुरस्थित नेपाल मेडिसिटी अस्पतालमा भर्ना गरिएको थियो ।

सिरोहियाले अवैधानिक तवरले नागरिकता हासिल गरेकोले अनुसन्धान र कारवाही गर्नका लागि सर्लाहीका इन्द्रजित महतोले दिएको जाहेरीका आधारमा धनुषा प्रहरीले गत १७ वैशाखमा जाहेरी दर्ता गरेको थियो । प्रहरीले सिरोहियालाई पक्राउ गर्न ८ जेठमा अदालतबाट अनुमति लिएको थियो भने अदालतले पक्राउ गर्न अनुमति दिएलगत्तै काठमाडौं उपत्यका अपराध अनुसन्धान कार्यालयका प्रमुख एसएसपी सानुराम भट्टराईसहितको प्रहरी टोलीले थापाथलीस्थित कान्तिपुरको कार्यालयबाट सिरोहियालाई नियन्त्रणमा लिएको थियो ।