यस वर्षको मदन भण्डारी राष्ट्रिय पुरस्कार पाँचथरमा रहेको कञ्चनजङ्घा चिया बगान तथा अनुसन्धान केन्द्रलाई प्रदान गरिने भएको छ । मदन भण्डारी फाउण्डेसनले बुधबार (आज) राजधानीमा पत्रकार सम्मेलन गर्दै सो घोषणा गरेको हो ।

नेपालको लोकतान्त्रिक आन्दोलनमा नयाँ वैचारिक र राजनीतिक दर्शनका क्षेत्रमा जननेता मदन भण्डारीका योगदानको स्मरण गर्दै, उनको व्यक्तित्वलाई सम्मान गर्न र विचार तथा मार्गदर्शनलाई जीवन्त बनाइराख्न सामाजिक, आर्थिक, राजनीतिक तथा सामाजिक रूपान्तरणलगायतका क्षेत्रमा महत्वपूर्ण काम गर्ने संस्था र व्यक्तित्वहरूलाई प्रत्येक वर्ष पुरस्कार दिने गरेको छ । यस्तो पुरस्कार फाउण्डेशनले २०६८ सालदेखि दिन थालेको फाउण्डेसनका अध्यक्ष महेन्द्रबहादुर पाण्डेले पत्रकार सम्मेलनमा जानकारी दिए ।

२०४१ सालदेखि नेपालमा चिया प्रवर्द्धनमा कृयाशील अनुसन्धान केन्द्रले अर्ग्यानिक चिया उत्पादन गर्दै स्वदेश र विदेशमा विक्री गर्दै आएको छ । स्थानीय कच्चापदार्थको प्रयोगलाई मुख्य आधार मान्दै प्रांगारिक चिया खेतीका माध्यमबाट रोजगारी सिर्जना, स्थानीय बजार व्यवस्थापन, निर्यात प्रवर्द्धन गरी राष्ट्रिय अर्थतन्त्रलाई टेवा पुर्‍याएको मदन भण्डारी फाउण्डेसनको ठहर छ । ९५ हेक्टर जमिनमा फैलिएको ६ लाखभन्दा बढी चियाका विरुवा रोपण गरिएको यो बगानलाई नयाँ र नवीन आयुर्वेदिक/जैविक खेती प्रविधिमार्फत १० प्रकारका चिया र १३ प्रकारका जडीबुटी, प्राकृतिक मसलाहरुसहित बार्षिक रुपमा १ सय टनभन्दा बढी चिया उत्पादन गर्दै आएको छ ।

यहाँ उत्पादन भएको चिया स्वदेश एवं जापान, जर्मनी, क्यानडा, अष्ट्रेलिया, कोरिया, युक्रेन, संयुक्त राज्य अमेरिका, पोल्याण्ड, नेदरल्याण्ड, फिनल्याण्ड, चीन र भारत लगायतका देशहरुमा समेत उत्पादन निर्यात गरेर वार्षिक ४ करोड रुपैयाँभन्दा बढीको कारोबार भइरहेको छ ।

केन्द्रले १ सय ५० भन्दा बढी किसानलाई प्रत्यक्ष र ४ सय जनालाई अप्रत्यक्ष रूपमा रोजगारी, कामदारका छोराछोरीलाई छात्रवृत्ति, इको-हाउस परियोजना, गाई बैंक परियोजना, किसान सहकारी पसल, सामुदायिक विकास निर्माणजस्ता कायमार्फत कर्पोरेट सामाजिक उत्तरदायित्वमा पनि योगदान पुर्‍याएको फाण्डेसनका अध्यक्ष पाण्डेले जानकारी दिए ।

‘समकालीन राष्ट्रिय तथा अन्तर्राष्ट्रिय राजनीतिका शिखर व्यक्तित्व, नवीन विचारक तथा उन्नत राजनीतिक संस्कृतिका प्रणेता, सिद्धान्तनिष्ठ राजनीतिज्ञ तथा राष्ट्रियता, लोकतन्त्र, मानवअधिकार र जनजीविकाका प्रवल पक्षधर नेपाली जनताका नेता मदनकुमार भण्डारीका राजनैतिक योगदान, सोच, विचारहरूको संरक्षण एवं तिनको व्याख्या विश्लेषण र विकास गर्न सामाजिक रूपान्तरण, लोकतन्त्र र राष्ट्रियताका लागि उनले दिएका योगदानसमेतको अध्ययन, अनुसन्धान गर्ने उद्देश्यले २०५६ सालमा फाउण्डेसन स्थापना भएको हो’- पत्रकार सम्मेलनमा अध्यक्ष पाण्डेले भने ।

फाउण्डेसनले पुरस्कार वितरण गर्न आवेदनहरु माग गरेको र पुरस्कृत गर्न गठित विज्ञहरुको स्वतन्त्र छनौट समितिले गरेको छलफल, विश्लेषण एवं सिफारिश र फाउन्डेशनको केन्द्रीय सचिवालयले गरेको निर्णयका आधारमा केन्द्र छनोट भएको हो ।

यही असार १४ गते जननेता मदन भण्डारीको ७३ औं जन्मजयन्तीको अवसरमा आयोजना हुने विशेष कार्यक्रममा १ लाख रुपैयाँ नगदसहितको सम्मान-पत्र केन्द्रलाई प्रदान गरिनेछ ।