बंगलादेशकी निवर्तमान प्रधानमन्त्री शेख हसिनाप्रति बफादारी देखाएको कारण बङ्गलादेशको एक अदालतले क्रिकेटर शकिब अल हसनको सम्पत्ति जफत गर्ने आदेश दिएको छ ।

क्रिकेटर शकिब पूर्वप्रधानमन्त्री हसिनाको पार्टीका पूर्व सांसद हुन् । हसिनालाई गत वर्ष विद्यार्थी नेतृत्वको विद्रोहमा हटाइएको थियो र उनी हेलिकप्टरबाट छिमेकी भारत भागेकी थिइन् ।

हसिनासँगको शकिबको सम्बन्धले उनलाई जनताको आक्रोशको निशाना बनाएको छ भने विद्रोहको समयमा प्रदर्शनकारीहरूमाथि घातक प्रहरी दमनका जिम्मेवार ठानिएर हत्या अनुसन्धानको सामना गरिरहेका दर्जनौँ व्यक्तिमध्ये उनी पनि एक थिए ।

ती आरोपहरूमा शकिबमाथि आरोप लगाइएको छैन तर हाल उनमाथि तीन लाख डलरभन्दा बढीको चेकहरू बाउन्स गरेको भनी ठगीको आरोपमा मुद्दा चलिरहेको छ ।

अदालतले जनवरीमा शकिबको गिरफ्तारीका लागि वारेन्ट जारी गरेपछि राजधानी ढाकाका मजिस्ट्रेटले सोमबार (२४ मार्च) जफत गर्ने आदेश दिएका हुन् ।

हसिनाको सरकार पतन हुँदा शकिब क्यानाडामा घरेलु टी-२० क्रिकेट प्रतियोगितामा खेलिरहेका थिए र त्यसयता उनी बङ्गलादेश फर्किएका छैनन् ।

बायाँ हातका अलराउन्डर शकिबले बङ्गलादेशका लागि ७१ टेस्ट, दुई सय ४७ एकदिवसीय अन्तर्राष्ट्रिय र एक सय २९ टी-२० खेलेका छन् र कुल सात सय १२ विकेट लिएका छन् ।