लण्डन । रोयाल मेलले गुर्खाहरुको सम्मानमा राइफल म्यान कुलबीर थापाको तस्वीरको नयाँ टिकटको शुरुवात गरेको छ । सन् १९१५ को सेप्टेम्बर २५ तारिखका दिन, सेकेण्ड बटालियन, थर्ड क्वीन अलेक्जान्ड्राकाे आफ्नै गुर्खा राइफल्समा सेवा दिँदै आएका कूलबीर थापाको समूहहरु जर्मनी हमालामा होमियो । आफ्नो बटालियनबाट एक्लिएका घाइते थापा जर्मनीहरुका क्याम्पनजिक पुग्न सफल भएका थिए । नजिकै एक ब्रिटिश सिपाहीं घाइते हालतमा थापाले फेला पारे र उक्त घाइतेलाई हेरचाह गर्न पूरा दिन अनि रात बिताएर भोलिपल्ट विहान सुरक्षित अवस्थामा आफ्नो क्याम्पमा लिएर आएका थिए । त्यति मात्र नभई, आफै पनि घाइते हुँदाहुँदै फेरि जर्मनीको अड्डानजिक गएर अन्य दुई घाइते ब्रिटिश सिपाहींहरुको पनि उनले उद्धार गरेका थिए । उनको त्यही निस्वार्थ वीरतापूर्ण कार्यको लागि भिक्टोरिया क्रस दिइएको थियो र उनी नै नेपाली पहिलो भी.सी. थिए ।

रोयाल मेलको यो कदमको जोयना लुम्लेले खुलेरै प्रशंसा गरेकी छिन् । ‘हिमाली भेगहरुमा बाँच्ने गुर्खाहरुले पहिलो विश्वयुद्धताका फ्लाण्डरस्का हिलोमा हजारौंले आफ्नो जीवन त्याग्न वाध्य भएका थिए । ब्रिटेनको लागि तिनले गरेका त्याग र लगानीको कदर यसरी गरिएकोमा म निक्कै पुलकित भएकी छु,’ उनले भनेकी छिन् ।

हरेक वर्ष, युद्धको झलकहरु टिकटहरुमा राखिँदै जाने क्रममा रोयाल मेलले विभिन्न छ वटा क्रमशः पप्पी पोयट्री, पोट्रेटस्, वार आर्ट, मेमोरियल र आर्टेफ्याक्टस्को प्रस्तुतिहरु प्रयोग गर्नेगर्दछ ।

भर्खरै नपालमा गएको भूकम्पबाट हजारौं ज्यान जानुका साथै लाखौं लाख सम्पतिहरुको नोक्सानी भएको अवस्थालाई राहत दिनको लागि यिनै जोयना लुम्लेको अगुवाइमा आठ अर्वभन्दा ज्यादा रकम बेलायती जनताले राहत स्वरुप दिएका छन् । यसबाट पनि बेलायती जनताको हृदयमा गुर्खाहरुको लागि सदभाव पूर्ण रुपमा रहेको स्पष्ट हुन्छ । नेपालको भन्दा ज्यादा जनधनको क्षति भएको हैटीलाई भन्दा बेलायती जनताले नेपालमा भएको प्राकृतिक प्रकोपमा ज्यादा सम्वेदनशीलता देखाउनुलाई तिनीहरुको गुर्खा र तिनको पृष्ठभूमिप्रतिको मोह भएको हो भन्न हिच्किचाउनु हुँदैन ।