नेकपाले गऱ्यो सात नेतामाथि कारवाही

माओवादी पार्टीको अस्तित्व मेटाएर नेपाली कम्युनिष्ट पार्टी खोलेका प्रचण्डले लामो समयदेखिको आफ्ना मित्र एवम् माओवादी आन्दोलनका चर्चित नेता हरिबोल गजुरेलमाथि कारवाहीको डण्डा प्रहार गरेका छन् । पार्टीको आधिकारिक उम्मेदवारविरुद्ध निर्वाचनमा मनोनयन दर्ता गराएको भन्दै उनले गजुरेललाई पार्टीबाट निष्कासन गरेका हुन् ।

प्रचण्ड संयोजक रहेको नेपाली कम्युनिष्ट पार्टीले पार्टीका आधिकारिक उम्मेदवारविरुद्ध मनोनयन दर्ता गराएका तथा उनीहरुलाई समर्थन गरेका सात जना नेता तथा कार्यकर्तालाई कारबाही गरेको छ । यिनै सातमध्ये एक गजुरेल पनि हुन् ।

पार्टीका संयोजक प्रचण्ड र सहसंयोजक माधवकुमार नेपालले आज (१० माघ) जारी गरेको संयुक्त विज्ञप्तिमा पार्टीका निर्णय र निर्देशनविपरीत उम्मेदवार बनेका र त्यस्ता उम्मेदवारका प्रस्तावक, समर्थक तथा प्रचारक बनेका नेता तथा कार्यकर्तालाई पार्टीबाट निष्काशन गरिएको जनाइएको छ ।

सो पार्टीले सिन्धुलीका नेता हरिबोल गजुरेल र महेश्वर दाहाल, दाङका कुलप्रसाद केसी, उदयपुरका मेजर राई, सिरहाका धर्मनाथ साह, राजकुमारी साह र जिवछ साहलाई निष्काशन गरिएको जनाएको छ ।