भुटानमा थप हजारौँ नेपालीभाषीलाई खेदेर शरणार्थी त्यहाँको सरकारले जालझेल गरिरहेको भुटानी मानवअधिकार आन्दोलनका अगुवा टेकनाथ रिजालले आरोप लगाएका छन् । भुटानी शरणार्थीका ८० हजार जति नातेदारलाई भुटानी चुनावमा मत खसाल्न नदिएर अर्धनागरिक झैँ बनाइएको उल्लेख गर्दै उनले यो ठूलो षडयन्त्र भएको दाबी गरे ।

मंगलबार झापाको दमकमा संचारकर्मीहरुसँग कुरा गर्दै शरणार्थी नेता रिजालले भुटानी शरणार्थीको स्वदेश फिर्तीका लागि नेपालले सही कदम उठाउन नसक्दा शरणार्थी समस्या लम्बिँदै गएको आरोप लगाए । भुटानी शरणार्थीको दिगो समाधानमा नेपाल सरकारको कूटनीति प्रभावकारी हुन नसकेको आरोप लगाए। उनले शरणागत भुटानी स्वदेश फर्कन नपाएको र नचाहँदा नचाहँदै विश्वका विभिन्न मुलुकमा छरिनुपरेको भन्दै गुनासो गरे ।

नेपालले भारतलाई यो समस्या समाधानमा साथ लिन नसक्दा शरणार्थी समस्या कायम रहेको उनले पटक पटक दोहोर्याए । सरकारले शरणार्थीलाई धमाधम पुनर्वासमा मात्र प्राथमिकता दिँदा शिविर रित्तिँँदै गएको र स्वदेश फर्कन पाउने अधिकारबाट भुटानी वञ्चित हुनुपरेको गुनासो उनको थियो ।

दक्षिण भुटानका चिराङ, दागना, छुका, साम्ड्रपजोंखर, सर्भाङ र साम्ची जिल्लाका नेपालीभाषीलाई भुटानको नेसनल एसेम्ब्लीको निर्वाचनमा मतदान गर्न दिइएको रिजालको भनाइ थियो । उनले भने– “वाङचुक वंशको राजसंस्थाले भुटानबाट नेपालीभाषीलाई खेद्ने प्रपञ्च रचिँदै छ ।” अर्को प्रसङ्गमा नेता रिजालले भुटानभित्रको प्रजातन्त्र र मानवअधिकार आन्दोलनको स्थितिको स्वतन्त्र अनुगमन नभएको जिकिर गरे ।