आर्थिक रूपले विपन्न व्यक्तिका मुटुको उपचारका लागि सरकारले दिने निःशुल्क सेवा गौतमबुद्ध सामुदायिक मुटु अस्पताल बुटवलमा पनि उपलब्ध हुने भएको छ । गरिब तथा विपन्न व्यक्तिहरूको मुटुको उपचारमा एक लाख रुपैयाँसम्मको उपचार निःशुल्क गर्ने सरकारको निर्णयअनुरुप मुटु अस्पतालमा पनि त्यो सेवा उपलब्ध गराइएको अस्पतालले जनाएको छ ।

स्वास्थ्य मन्त्रालयले निःशुल्क मुटुको उपचारको लागि गौतमबुद्घ सामुदायिक मुटु अस्पताललाई सुचीकृत गरेपछि बुटवलबाटै पनि गरिब तथा विपन्न व्यक्तिहरुले सरकारको उक्त सुविधा लिन पाउने भएका हुन् । निःशुल्क सेवा उपलब्ध गराउने विषयमा स्वास्थ्य सेवा विभाग व्यवस्थापन महाशाखा टेकु र गौतमबुद्घ सामुदायिक मुटु अस्पतालबीच सम्झौता भएको अस्पतालका अध्यक्ष एजाज आलमले जानकारी दिए ।

विभिन्न जिल्लाका जिल्ला स्तरीय विपन्न नागरिक औषधी उपचार सिफारिस समितिको सिफारिसको आधारमा अस्पतालले १ लाखसम्म निःशुल्क सेवा उपलब्ध गराउने छ । राजधानीका विभिन्न अस्पतालबाट उक्त सेवा प्राप्त भए पनि पश्चिम क्षेत्रमा भने निःशुल्क सेवा उपलब्ध गराउने गौतमबुद्ध सामुदायिक मुटु अस्पताल पहिलो अस्पताल बनेको छ । अस्पतालमा सोमबारदेखि क्याथल्याब सेवा समेत संचालन भएको छ । पहिलो दिन सोमबार नै चारजना विरामीको एन्जियोग्राफी गरिएकोमा मंगलबार पनि चारजना विरामीको एन्जियोग्राफी गरिएको अस्पतालले जनाएको छ ।

यस अस्पतालले विगत ४ महिनादेखि मृगौलाका बिरामीहरुलाई निःशुल्क डायलाइसिस सेवा पनि प्रदान गर्दै आएको छ । १७ वटा मेसिनबाट दैनिक ३५ देखि ४० जना बिरामीहरुलाई निःशुल्क डाइलाईसिस सेवा उपलब्ध गराईरहेको यो युनिट काठमाडौंबाहिरको सबैभन्दा ठूलो डाइलाईसिस युनिट रहेको अस्पतालका निर्देशक डा. समिर गौतमले बताउनु भयो । अस्पतालमा अहिले १ सय २७ जना विरामीले सरकारले उपलब्ध गराएको निशुल्क डाइलाईसिस सेवा लिइरहेको उनले बताए ।

यसका साथै अस्पतालले सिटी स्क्यानको लागि रोटरी क्लब अफ सेन्ट्रल बुटवल र रोट्¥याक्ट क्लब अफ सेन्ट्रल बुटवलसँग सहकार्यको लागि सम्झौता समेत गरिसकेको जनाएको छ । क्लबहरुको सहयोगमा १ सय २८ स्लाईसको सिटी स्क्यान संचालनको लागि खरिद प्रकृया अगाडी बढाइएको अस्पतालले जनाएको छ । उक्त मेशिन जडान श्चात मुटु र मृगौलाको समेत सिटी स्क्यान बुटवलमै गर्न सकिने डा. गौतमले जानकारी दिए ।

– चन्द्रकान्त खनाल, बुटवल