प्रमुख प्रतिपक्षी नेकपा (एमाले)ले स्थानीय तह निर्वाचन सम्पन्न भएपछि मात्रै संविधान संशोधनको विषयमा छलफल गर्ने सहमतिविपरीत सत्ता गठबन्धनद्वारा पुनः संविधान संशोधनको चर्चा चलाएको विषयप्रति गम्भीर ध्यानाकर्षण भएको जनाएको छ । गत सोमबार सम्पन्न नेकपा (एमाले) स्थायी कमिटीको बैठकका निर्णयबारे जानकारी दिँदै केन्द्रीय कार्यालयका सचिव प्रदीप ज्ञवालीले प्रस्तावित संविधान संशोधन प्रस्ताव राष्ट्रिय हीतविपरित र अनुचित रहेको पार्टीको अडान दोहो¥याउँदै संशोधनको प्रस्ताव पारित हुन नसक्ने जनाएका छन् ।

असार १४ गते सम्पन्न दोस्रो चरणको स्थानीय तह निर्वाचनमा सत्ता गठबन्धनद्वारा राज्यशक्तिको चरम दुरुपयोग गर्दै नेकपा एमालेलाई चौतर्फी घेराबन्दी गरिएको आरोप पनि सो दलले लगाएको छ । यस्ता प्रतिकुलताका बाबजुद एमाले पहिलो शक्तिको रुपमा स्थापित भएकोमा बैठकले सन्तोष व्यक्त गरेको ज्ञवालीले जनाएका छन् । उनका अनुसार आगामी असोज २ गतेका लागि तय गरिएको प्रदेश नम्बर २ को स्थानीय तह निर्वाचन निष्पक्ष, शान्तिपूर्ण, भयरहित र स्वच्छ वातावरणमा सम्पन्न गर्न सम्बन्धित सबै पक्षको ध्यानाकर्षण गराइएको छ भने प्रतिनिधि सभा र प्रदेश सभा निर्वाचनको प्रयोजनका लागि यही साउन १ गतेदेखि मतदाता नामावली संकलन गर्ने सूचना निर्वाचन आयोगबाट जारी भएको सन्दर्भमा सोहीअनुसार योजनाबद्ध रुपमा लाग्न आफ्ना तल्ला तहका कमिटीहरूलाई एमालेले निर्देशन गरेको छ ।