भक्तपुरको सूर्यविनायक नगरपालिका–९ पलासेस्थित वाटर किङडम रिसोर्टबाट चितुवाको छाला एक थानसहित तीन जनालाई प्रहरी प्रधान कार्यालय केन्द्रीय अनुसन्धान व्युरो काठमाडौंको प्रहरी टोलीले पक्राउ गरेको छ । सिन्धुपाल्चोकको मेलम्ची नगरपालिका–१० शिखरपुर बस्ने २७ वर्षीय जीवन तामाङ, दोलखाको तामाकोशी गाउँपालिका–२ बस्ने २७ वर्षीय सुरेन्द्र पाख्रिन र दोलखाकै भिमेश्वर नगरपालिका–९ बस्ने २० वर्षीय सिंहवीर तामाङ पक्राउ परेका हुन् । उनीहरुलाई प्रहरीले जिल्ला बन कार्यालय भक्तपुरमा बुझाएको प्रहरीले जनाएको छ ।

उक्त घटना सम्बन्धमा प्रारम्भिक अनुसन्धानको क्रममा दोलखाको भिमेश्वर नगरपालिका–९ जसमन्ते बस्ने बमबहादुर श्रेष्ठले चितुवा मारी छालासहित उनीहरुलाई बिक्री गरेको भन्ने जानकारी गराएपछि जिल्ला प्रहरी कार्यालय दोलखा र प्रहरी चौकी खरिढुङ्गाबाट खटिएको प्रहरीले बमबहादुरको घर खानतलासी गरेको थियो । सो क्रममा ओच्छ्यानको तन्नाभित्र लुकाई राखेको अवस्थामा संरक्षित चितुवाको ढाडको भागको हड्डी, चितुवाको सुकुटी, दुम्सीको दाँतसहितको दाह्रा १ थान, दुम्सीको काँडा १ सय २५ थान र दुम्सीको भुँडीसहित फेला पारी उक्त बन्यजन्तु चितुवाको अखेटोपहार छिपाई राख्ने बमबहादुर समेतलाई पक्राउ गरेको प्रहरीको भनाई छ ।

उता गौर नगरपालिका–३ कबिरचोकस्थित चपुरबाट गौरतर्फ जाँदै गरेको बिआर ०५ पिए ०९१२ नम्बरको सुमो गाडीमा सवार गौर नगरपालिका–७ बस्ने २१ वर्षीय सरोज राय यादव र गाडी चालक गौर नगरपालिका–३ बीपीचोक बस्ने २४ वर्षीय दिनानाथप्रसाद गुप्तालाई अवैध रूपमा ल्याएको सुनसहित शुक्रबार प्रहरीले पक्राउ गरेको छ । हालको मुल्यअनुसार करीव ४६ लाख ७२ हजार ५ सय रुपैयाँ मुल्य बराबरको १ किलोग्राम सुनसहित अभियुक्तहरूलाई नियन्त्रणमा लिइएको हो ।