धादिङको खनियाबास गाउँपालिका–४ स्थित दार्खा प्रहरी चौकीमा कार्यरत प्रहरी सहायक निरीक्षक वीरबहादुर गुरुङको गत साता भएको हत्यामा स्थानीय एक महिलाको संलग्नता रहेको खुलेको छ । श्रीमानसमेतको मिलेमतोमा प्रहरी अधिकाीको हत्यामा संलग्न भएको आरोपमा आइतबार तारा थापा मगर नामक महिलालाई प्रहरीले नियन्त्रणमा लिएको छ ।

धादिङ प्रहरीका अनुसार प्रहरी चौकीनजिकै घर भएकी तारालाई प्रहरीले हत्या आरोपमा पक्राउ गरिएको हो । हत्या आरोप लागेका थापामगरका श्रीमान सुशील गुरुङ फरार छन् । बलियो घर कार्यक्रमअन्तर्गत सामाजिक परिचालक पदमा कार्यरत गुरुङले श्रीमती थापामगरको सहयोगमा घरमा बोलाएर प्रहरीको हत्या गरेको अनुसन्धानबाट खुलेको छ ।

गत साता बिहीबार प्रहरी चौकीमा नै रहेका मृतक वीरबहादुरको लास शुक्रबार बिहान प्रहरी चौकी नजिकै मकैबारीमा फालिएको अवस्थामा भेटिएको थियो । गोरखा जिल्ला निवासी प्रहरी सहायक निरीक्षक गुरुङ गत चैतदेखि दार्खामा कार्यरत थिए । प्रहरी चौकीका प्रमुख बिदामा गएकाले घटना भएको दिनमा गुरुङ नै प्रहरी चौकीका इञ्चार्जका रुपमा रहेका थिए ।

फरार रहेका अभियुक्त सुशीललाई छिट्टै पक्राउ गरिने र हत्याको कारणबारे खुलस्त हुने बताइएको छ ।