नेपालमा दुई दशकदेखि शरणार्थी जीवन बिताइरहेका भुटानी शरणार्थीको शिविर बसाइको वास्तविक कथा प्रस्तुत गरिएको फिल्म ‘देश खोज्दै जाँदा’ आगामी भदौ ८ गतेबाट देशव्यापी प्रदर्शनमा आउने भएको छ । भुटानी शरणार्थीहरूले गरेको आन्दोलन, तिनले भोगेको दुःख–कष्ट र उनीहरूले नेपाललाई छोडेर तेस्रो मुलुक जानुपर्दाको पीडालाई देखाइएको फिल्मको निर्देशन प्रकाश आङदेम्बेले गरेका हुन् ।

हालै राजधानीमा आयोजित एक कार्यक्रमबीच फिल्मको नयाँ ट्रेलर देखाउँदै निर्देशक आङदेम्बेले फिल्ममा भुटानी शरणार्थीको मौलिक, रहस्यात्मक र पारिवारिक जीवनका आन्तरिक तथा बाह्य द्वन्द्वलाई मार्मिक ढङ्गले उजागर गरिएको अभिव्यक्तिसमेत दिए ।

सोही अवसरमा फिल्मका नायक तथा गायक बाबु बोगटीले ‘देश खोज्दै जाँदा’ले आफ्नो करिअरमा महत्वपूर्ण भूमिका खेल्ने दाबी गरे । फाइनआर्टसँग आबद्ध निर्वासित भुटानीहरूको संस्था इफकेन्स इन्टरनेसनल फाउन्डेसन, इफाका भुटान, लाइन क्रस मुभिज र गन्तव्य थिएटरको संयुक्त ब्यानरमा निर्मित उक्त फिल्ममा बाबु बोगटी, हेमन्त बुढाथोकी, मीना कोइराला, अरुणा कार्की, सरिता वली, तिब्बत राई, एलपी जोशी, शिवशंकर थापा, केशव आचार्य, टंक विकल्प, सुवास थापा र प्रताप सुब्बाको अभिनय देख्न पाइन्छ ।