प्रधानमन्त्री शेरबहादुर देउवाकी पत्नी एवम् नेपाली कांग्रेसबाट समानुपातिक सांसद आरजु राणा देउवाले आफ्नो राजनीतिक कर्मक्षेत्र बर्दियालाई बनाउन लाग्नुभएको जानकारी घटना र विचारलाई प्राप्त भएको छ । पहिले डडेल्धुरामा केन्द्रित आरजुको ध्यान पछिल्लो समय बर्दियातर्फ मोडिएको छ र बर्दियालाई आफ्नो निर्वाचन क्षेत्र बनाउन जग राख्ने कार्यको आरम्भ भएको छ ।

जानकारीअनुसार आफ्नी माता एवम् राप्रपा नेतृ प्रतिभा राणालाई जापानका लागि राजदूत नियुक्त गरेर पठाउनु र बर्दिया कांग्रेसका नेता सञ्जय गौतमलाई सिँचाइमन्त्री बनाउनुको मूल कारण आरजु देउवाका लागि बर्दियाको ढोका खोल्नु भएको बताइन्छ । प्रतिभा राणाले बर्दियालाई आफ्नो निर्वाचन क्षेत्र बनाउँदै आउनुभएकोमा उहाँ राजदूत बनेर जानुभएपछि अब चार वर्षसम्म सक्रिय राजनीतिमा फर्कने सम्भावना क्षीण भएको छ । राप्रपाको कोटामा पारेर प्रतिभालाई जापानको राजदूत बनाइएको भए पनि उहाँलाई राजदूत बनाउन प्रधानमन्त्री शेरबहादुर देउवा र आरजु देउवाको मुख्य भूमिका रहेको थियो ।

त्यस्तै, बर्दिया काङ्गे्रसका सभापतिसमेत रहनुभएका प्रतिभाशाली युवा नेता सञ्जय गौतमलाई मन्त्री बनाउन पनि आरजु र प्रधानमन्त्री देउवाकै मुख्य योगदान भएको बुझिन्छ । गौतम आफैँ त्यस क्षेत्रमा लोकप्रिय एवम् क्षमतावान नेता मानिनुहुन्छ र मन्त्री बन्न योग्य व्यक्तिका रूपमा पनि उहाँलाई लिइन्छ । तर, गौतमलाई काङ्गे्रस महामन्त्री शशाङ्क कोइरालाको कोटाबाट मन्त्रिमण्डलमा सामेल गरिएको छ । यद्यपि कोइरालाको कोटामा बनाइएको भए पनि प्रधानमन्त्री देउवा र आरजु देउवाको समेत इच्छाबाट गौतम मन्त्री बन्नुभएको हो ।

यसरी गौतमलाई मन्त्री बनाइएपछि भोलिका दिनमा राजनीतिमा आरजुलाई सजिलो हुने विश्वास गरिएको छ । बर्दियाका अर्का काङ्ग्रेस नेता किशोरसिंह राठौरलाई देउवा परिवारको निकटस्थ व्यक्तिका रूपमा लिइन्छ । राठौर यसअघि बर्दियाबाट टिकट पाएर पनि उनले पराजय व्यहोर्नुपरेको थियो र राठौरलाई अपाङ्गको कोटामा पारेर समानुपातिकतर्फको सांसद बनाइने विश्वास दिलाइएको जानकारीमा आएको छ ।

यसअघि चारवटा निर्वाचन क्षेत्र रहेको बर्दियामा नयाँ संरचना बनाइँदा तीनवटा मात्र क्षेत्र बन्ने सम्भावना छ । तीन निर्वाचन क्षेत्र भएमा एउटामा सञ्जय गौतम स्वयम् उम्मेदवार बन्ने निश्चित छ । अर्को एक क्षेत्रबाट अब आरजु राणा देउवाले उम्मेदवारी दिने पनि निश्चितप्रायः छ । बाँकी एक क्षेत्रमा दाबेदारहरू धेरै भएकोले कसले मौका पाउने हो अहिले नै भन्न सकिने स्थिति छैन । तात्कालिक परिस्थिति हेरेर उपयुक्त व्यक्तिलाई उम्मेदवार बनाउने अनुमान गर्न सकिन्छ । यसअघि उम्मेदवार बनाइएकी मालती सोडारीको पक्षमा जिल्ला पार्टी सभापतिसमेत रहनुभएका मन्त्री सञ्जय गौतम हुनुहुन्छ । गौतमको चल्यो भने मालती नै पुनः उम्मेदवार बन्ने निश्चित मानिन्छ । जे होस्, बर्दिया अब आरजु देउवाको ‘कर्मभूमि’ हुने सम्भावना बढेको छ । उहाँ त्यहाँबाट विजयी बन्न सक्नुभएमा प्रधानमन्त्री देउवाको उत्तराधिकारी बन्ने मार्ग प्रशस्त हुने ठानिएको छ ।