निर्वाचन आयोगको घोषित कार्यतालिका अनुसार दोस्रो चरणको प्रदेश तथा प्रतिनिधिसभा सदस्य निर्बाचन हुने ४५ जिल्लाहरुमा आज मनोनयन हुँदैछ ।

आगामी मंसिर २१ गते हुने निर्बाचनका लागि दलहरुले मनोनयन गर्ने छन् ।

दोस्रो चरण अन्तर्गत निर्बाचन हुने ४५ जिल्लामा प्रतिनिधिसभा सदस्यतर्फ १ सय २८ निर्वाचन क्षेत्र छ । प्रदेशसभातर्फ २ सय ५६ निर्वाचन क्षेत्र रहेको निर्बाचन आयोगले जानकारी दिएको छ ।

यसअघि पहिलो चरणको निर्बाचनका लागि दलहरुले कात्तिक ५ गते ३२ जिल्लामा उम्मेदवारी मनोनयन दर्ता गरिसकेका छन् । यी जिल्लामा मंसिर १० गते निर्वाचन हुँदैछ । दलहरु प्रचारमा समेत लागीपरेका छन् ।

बिहीबार कार्यालय समयभित्र दलहरुले उम्मेदवारी दर्ता गराउन सक्ने आयोगले स्पष्ट पारेको छ । आयोगका अनुसार जिल्लामा स्थापना गरिएको मुख्य निर्वाचन अधिकृत तथा निर्वाचन अधिकृतको कार्यालयबाट दुवैतर्फको उम्मेदवारी दर्ता गराउन सक्ने प्रवन्ध मिलाइएको छ ।

उम्मेदवारी दर्ता कसरी गराउने ?
प्रतिनिधिसभातर्फ उम्मेदवारी दर्ता गराउन चाहनेले दलको सिफारिस पत्रसँगै एकजना प्रस्तावक र १ जना समर्थकको सहयोगमा उम्मेदवारी दर्ता गराउन सक्नेछन् । प्रस्तावक र समर्थक भने उम्मेदवारी दिने क्षेत्रकै हुनुपर्ने व्यवस्था निर्वाचन आयोगले गरेको छ ।

उता, प्रदेशसभा सदस्यतर्फ उम्मेदवारी दिन चाहने व्यक्तिले पनि प्रतिनिधिसभाको उम्मेदवारले जस्तै गरी आफ्नो दलको सिफारिसपत्र पनि पेश गर्नुपर्दछ । धरौटी जम्मा गरेको रसिद, नेपाली नागरिकताको प्रमाणपत्रको प्रतिलिपि र आफ्नो निर्वाचन क्षेत्रभित्रको मतदाता नामावलीमा नाम समावेश भएको प्रमाण पेश गर्नुपर्ने छ । अन्यथा मनोनयन दर्ता गर्न मिल्दैन् ।