अभिभावक वा आफन्तको मृत्युपश्चात केही दिन रोएर शोक मनाउने, दिन बित्दै गएपछि विस्तारै बिर्सने प्रवृत्तिजन्य प्रचलनलाई अर्घाखाँचीका केही चेलीले तोड्ने प्रयास गरेका छन् ।

अर्घाखाँची जिल्लाको भूमिकास्थान नगरपालिका वडा नम्बर १० निवासी टिकाराम चुँदालीले व्यक्तिगत सक्रियतामा ०१७ सालमा गाउँमा श्री सरस्वती आधारभूत विद्यालय खोलेका थिए । उक्त विद्यालयलाई सुविधासम्पन्न तुल्याउने चाहना पूरा हुन नपाउँदै करिव आठ वर्षअघि उनको देहान्त भएको थियो । उनीबाट जन्मिएका सन्तानमध्ये छोरीहरू सरस्वती चापागाई, कोमल पौडेल र जाल्पा भुसालले गत साता उक्त विद्यालयलाई धेरथोर सहयोगी हात बढाउने कार्यको शुरुवात गरेका छन् ।

एक समारोहका बीच टिकाराम गोमादेवी चुँदाली छात्रवृत्ति स्मृति कोष स्थापना गरि जेहेन्दार विद्यार्थीहरुलाई लक्षित गरि एक लाख एकाउन्न हजार रुपैयाँ हस्तान्तरण गरिएको छ । विद्यालय व्यवस्थापन समितिका अध्यक्ष विष्णुप्रसाद चुँदालीको सभापतित्व रहेको सो कार्यक्रममा जिविसका पूर्वसभापति पिताम्बर भुसालको प्रमुख आथित्यता रहेको थियो । प्रमुख अतिथि भुसालले आफनो मनत्व्यमार्फत सराहनीय कार्यको प्रशंसा गर्दै यसबाट सबैजनाले सेवाधर्मको पाठ सिक्न अनुरोध गरेका थिए ।

भुसालले रोजगारीको अभावमा धेरैजना विदेशिन बाध्य हुनुपरेको अवस्थामा सामुदायिक विद्यालयहरूमा लगानी मात्र हैन अब निगरानी गर्ने जिम्मेवारी समेत स्थानीयको काँधमा आएको उदघोष गरे । उनी स्थानीय क्षेत्रमा समाजसेवीका रुपमा चिनिँदै आएका छन् ।

गैरआवासीय नेपाली सङ्घको अन्तर्राष्ट्रिय समन्वय समिति सदस्यमा बेल्जियमबाट विजयी सरस्वती चापागाईंलाई सोही अवसरमा नेकपा एमाले भुनपा–१० वडा कमिटीको आयोजनामा स्वागत समेत गरिएको थियो । उनले आफ्ना पिताले शिक्षाक्षेत्रमा गर्न लागेको सेवाकार्यलाई आफूले आगामी दिनमा सक्दो अघि बढाउने प्रतिबद्धता जनाइन् ।