झापा अर्जुनधारा–११ का ११ वर्षीय बालक लक्ष्मण शिवाकोटीको रहस्यपूर्ण मृत्यु प्रकरणमा पक्राउ गरेका तीन आरोपीलाई पुर्पक्षका लागि कारागार चलान गरिएको छ ।

पीडित परिवारका तर्फबाट परेको उजुरीको आधारमा पक्राउ गरिएका सन्तोष पोखरेल, सुधिर पोखरेल र समीर पोखरेललाई झापा जिल्ला अदालतले शुक्रबार पुर्पक्षका लागि थुनामा राख्न आदेश दिएपछि कारागार चलान गरिएको जिल्ला प्रहरी कार्यालय झापाका प्रहरी प्रमुख प्रहरी उपरीक्षक विष्णु केसीले जानकारी दिनुभयो ।

गत असोज–१४ गते मृत अवस्थामा फेला परेका शिवाकोटीको हत्याको आरोपमा पीडित परिवारले किटानी जाहेरी दिएका ८ मध्ये ५ जना अझै फरार छन् ।

पक्राऊ परेका माथि कर्तव्य ज्यान मुद्दा चलाइएको प्रहरीले जनाएको छ । आरोपित अन्य पाँच जना फरार रहेका र उनीहरुको खोजी जारी रहेको प्रहरी उपरीक्षक केसीले जानकारी दिनुभयो ।