–छविलाल बगाले
भुकम्प गएको ३० महिना बितिसक्दा पनि भूकम्पपीडित नागरिकहरुले अझैसम्म पनि छानो पाउन सकेका छैन् । राज्यको ढिलासुस्ती र राजनैतिक लुछाचुँडीको कारण भूकम्पपीडितले यतिका समय बितिसक्दा पनि छानो पाउन नसकेका हुन् ।

तीन वर्षको बर्खा र २ वर्षको जाडो टहरामूनि नै बिताएका भूकम्पपीडितहरु अझै सरकारको बाटो हेरेर बसिरहेका छन् त कतिपयले आफैं पनि आवास निर्माण गरिसकेका छन् ।

तर राष्ट्रिय पुनर्निर्माण प्राधिकरणले अहिलेसम्म ७० हजार भुकम्पपीडितले छानो पाइसकेको दावी गरेको छ । यस्तै, सभालाख भुकम्पपीडितले दोस्रो किस्ताको लागि दावी गरेको, २१ हजारले आवेदन दिई प्रमाणीकरण समेत भइसकेको र ११ हजार आवास गैह्रसरकारी संघसंस्थाहरुले निर्माण गरिरहेको प्राधिकरणका सहप्रवक्ता डा. भिष्मकुमार भुषालले जानकारी दिए ।

प्राधिकरणले यसै आर्थिक बर्षको मसान्तभित्रै सबै जिल्लाका भूकम्पपीडितलाई छानासहितको आवास दिने गरी समय तालिका समेत सार्बजनिक गरेको जनाएको छ । प्राधिकरणका अनुसार गत पौष मसान्तसम्म प्रथम किस्ता प्राप्त गरेका लाभग्राहीले आगामी पौष मसान्तभित्र दोस्रो किस्ता लिइसक्नुपर्ने, गत असार मसान्तसम्म प्रथम किस्ता प्राप्त गरेका लाभग्राहीले आगामी चैत मसान्तभित्र दोस्रो किस्ता लिइसक्नुपर्ने र आगामी पुस मसान्तभित्र दोस्रो किस्ता प्राप्त गर्ने लाभग्राहीले आगामी जेठ मसान्तभित्र तेस्रो किस्ता लिनुपर्ने जनाएको छ ।

यस्तै प्राधिकरणले आगामी चैत मसान्तभित्र दोस्रो किस्ता पाएका लाभग्राहीले आगामी असार मसान्तसम्म तेस्रो किस्ता लिइसक्नुपर्ने तालिका तयार बनाएर काम अघि बढाएको छ ।

प्राधिकरणले कामलाई छिटो र प्रभावकारी बनाउन जनशक्ति थप्ने, भूकम्पपिडितलाई सेवा सुविधा बढाउने र उक्त सुविधा प्राप्त गर्ने कार्यविधीलाई सरलीकरण बनाउने सहप्रवक्ता भुषाले बताउँछन् ।

प्राधिकरणले भूकम्पपिडितहरुको भुकम्प प्रतिरोधी नयाँ घरमा सर्ने सपना छिटै पुरा गर्नको लागि १७ जिल्लामा प्राविधिक पठाउने, ठाउँ-ठाउँमा डकर्मीको तालिम दिने र भुक्तानीको प्रक्रियालाई छोटो बनाउने तयारी गरिरहेको छ ।

साथसाथै देशले भुकम्पपछि लिएको पुनर्निर्माणको सपना छिटोभन्दा छिटो पुरा गर्ने लक्ष्य लिएको छ ।