कम्बोडियाको राजधानी नोमपेनमा आयोजना भएको प्रथम कुन खेमर विश्व च्याम्पियनसिपमा नेपाली खेलाडी अनिशा खड्काले प्रोफेसनल फाइटको उपाधि जितेकी छिन् । महिला ६७ केजी तौल समूहमा आयोजक कम्बोडियाकी पुथ थावेलाई पराजित गर्दै अनिशाले प्रोफेसनल फाइटको उपाधि जितेकी हुन् ।
कुन खेमरको प्रोफेसनल विधामा प्रतिस्पर्धा गरेकी अनिशाले पाँच राउन्डको खेलमा थावेलाई अङ्कका आधारमा पराजित गरेकी हुन् । खेलको सुरुदेखि नै आक्रामक रूपमा प्रस्तुत अनिशाले पाँच राउन्डसम्म त्यही आक्रामकतालाई जारी राख्दै उपाधि जितेकी हुन् । अनिशाले गत मार्चमा थाइल्यान्डमा भएको १४औँ विश्व मुवाँथाई च्याम्पियनसिपअन्तर्गत एमेच्योरमा स्वर्ण जितेकी थिइन् ।
कुन खेमरको एमेच्योर विधामा प्रतिस्पर्धा गरेका राहुलले तीन राउन्डको खेलमध्ये दोस्रो राउन्डमै पिसेथलाई नकआउट गरेका थिए । पहिलो राउन्डमा पिसेथ हावी भए पनि दोस्रो राउन्डमा संयमित भएर खेलेका राहुलले लगातार पञ्च प्रहार गर्दै नकआउट गरेका थिए । विदेशी भूमिमा पहिलोपटक प्रतिस्पर्धा गरेका राहुलले गत जुनमा नेपालमै भएको इन्डो–नेपाल मुवाँथाई च्याम्पियनसिपमा पनि स्वर्ण पदक जितेका थिए ।
प्रतियोगितामा एमेच्योरतर्फको पुरुष ६५ केजी तौल समूहमा नै प्रतिस्पर्धा गरेका सशिन्द्र रञ्जित र ७१ केजी तौल समूहमा प्रतिस्पर्धा गरेका सलोन सारा लेप्चा जैसी भने पराजय भएका थिए । उनीहरू दुवै आयोजक कम्बोडियाका खेलाडीसँग अङ्कका आधारमा पराजित भएका हुन् । कम्बोडियामा पहिलोपटक आयोजना गरिएको प्रतियोगितामा नेपालसहित १० राष्ट्रको सहभागिता रहेको थियो ।
प्रतिक्रिया