राष्ट्रिय मानवअधिकार आयोगले स्वास्थ्य क्षेत्रलगायतका विभिन्न माग राखी अनशनरत डा. गोविन्द केसीको स्वास्थ्य अवस्थाप्रति ध्यान दिन सरकारको ध्यानाकर्षण गराएको छ ।

आयोगकी प्रवक्ता मोहना अन्सारीले आज जारी गरेको प्रेस विज्ञिप्तमा स्वास्थ्योपचारजस्तो आधारभूत मानव अधिकारको विषयमा उठाइएका विषयप्रति संवेदनशील भई तत्काल डा. केसीसँग सरकारले विगतमा गरेका सम्झौता कार्यान्वयन गर्न पहल गरी डा. केसीको जीवनरक्षा गर्न माग गरिएको छ ।

विज्ञप्तिमा सर्वसाधारणको स्वास्थ्य सेवा पाउने हकप्रति सचेत रहँदै कुनै पनि पक्षबाट कतै पनि अत्यावश्यकीय स्वास्थ्य सेवा बन्द नगर्न–नगराउनसमेत आयोगले सम्बन्धित पक्षको ध्यानाकर्षण गराएको छ ।

डा. केसी जुम्लामा यही असार १६ गतेदेखि अनशनरत छन् । आयोगले डा. केसीलाई अनशनस्थलबाट तत्काल स्थानान्तरण गरी आवश्यक स्वास्थ्योपचारको व्यवस्था गर्न आयोगले यही असार १८ गते जिल्ला प्रशासन कार्यालय जुम्लालाई पत्राचारसमेत गरेको छ ।

त्यसैगरी ट्रान्सपरेन्सी इन्टरनेशनल नेपालका अध्यक्ष तथा वरिष्ठ अधिवक्ता हरि अर्यालले आज एक प्रेस विज्ञप्ति जारी गरी डा. केसीको माग पूरा गरी जीवनरक्षा गर्न माग गरेका छन् ।

अर्यालद्वारा जारी विज्ञप्तिमा भनिएको छ, ‘डा. गोविन्द केसीको उपचारका लागि गएको मेडिकल टोली प्रशासनिक अवरोधका कारण फिर्ता भएको र अनशन बसेका नागरिकलाई धरपकड गरेको घटनाप्रति ट्रान्सपरेन्सी इन्टरनेसनल नेपालको ध्यान आकृष्ट भएको छ ।’

विज्ञप्तिमा अगाडि भनिएको छ, ‘राज्यद्वारा गरिएका सम्झौता पालन गर्ने–गराउने प्रमुख दायित्व सरकारकै हो । टीआई नेपाल विकट क्षेत्रका नागरिकको स्वास्थ्य र गुणस्तरीय स्वास्थ्य सेवाका लागि निस्वार्थ भावले स्वास्थ्य सेवा आमनागरिकको पहुँचमा पु¥याउने ध्येय राखेर लडिरहेका डा. केसीको माग पूरा गरियोस्, निजको जीवनरक्षाको पहल तत्काल गरियोस् भन्ने माग पनि गर्दछ ।’