हिजो शनिबारबाट विभिन्न व्यक्तिका मोबाइलमा विदेशी टेलिफोनबाट नम्बरबाट कल आएपछि नेपाल टेलिकमले त्यस्ता अज्ञात फोन नउठाउन आग्रह गरेको छ ।

आफ्ना मोबाइलमा यस्ता अपरिचित विदेशी नम्बरबाट फोन आएपछि यसबारे सामाजिक सञ्जाल फेसबुक तथा ट्विटरमा चासोसमेत व्यक्त भएपछि टेलिकमले आइतबार उक्त कल रिसिभ नगर्न आह्वान गरेको हो ।

नेपाल टेलिकमकी प्रवक्ता प्रतिभा वैद्यका अनुसार जुन देशमा टेलिफोन शुल्क महँगो हुन्छ ती देशमा पैसा कमाउनका लागि अन्धाधुन्ध नम्बर मिलाएर फोन गर्छन्, त्यस्तो नम्बरमा कलब्याक गर्दा कल ट्रयाक हुने र सो हुँदा पैसा उनीहरूको खातामा ट्रान्सफर हुन्छ ।

उनका अनुसार टेलिकमले त्यस्ता आगमन कल निषेध गरिसकेको छ भने अज्ञात विदेशी नम्बरमा कलब्याक नगर्न बारम्बार सचेत गराउँदै आएको छ ।