नेपाली कांग्रेसका सभापति शेरबहादुर देउवाले कांग्रेस स्याङ्जाका सभापति तथा पूर्वसांसद कमलप्रसाद पंगेनीको निधनमा दुःख व्यक्त गरेका छन् ।

सभापति देउवाले आज शोक विज्ञप्तिमार्फत नेता पंगेनीको असामयिक निधनबाट कांग्रेस पार्टी तथा नेपालको लोकतान्त्रिक आन्दोलनको अभियानमा नै अपूरणीय क्षति पुगेको बताएका छन् । पंगेनीको आज बिहान ५ः३० बजे स्याङ्जामा हृदयाघातबाट निधन भएको हो ।

पूर्वप्रधानमन्त्री देउवाले श्रद्धाञ्जली अर्पण गर्दै उनको आत्माको चिरशान्तिको कामना र शोकसन्तप्त परिवारजनमा समवेदना व्यक्त गरेका छन् ।

पंगेनीको अन्त्येष्टि आजै गरिने पार्टी कार्यालयले जनाएको छ । कांग्रेस केन्द्रीय कार्यालयका सचिव प्रकाश शर्माका अनुसार अन्त्येष्टिमा सहभागी हुन सभापति देउवा, उपसभापति विमलेन्द्र निधि, महामन्त्री डा. शशांक कोइराला, केन्द्रीय सदस्य गोपालमान श्रेष्ठ, पार्टी केन्द्रीय कार्यालयका मुख्य सचिव कृष्णप्रसाद पौडेललगायत नेता आजै स्याङ्जा प्रस्थान गरे ।

नेपालको लोकतान्त्रिक आन्दोलनमा सक्रिय पंगेनीप्रति सम्मान प्रकट गर्न कांग्रेसले यही साउन २१ गते केन्द्र र ७७ वटै जिल्ला कार्यालय बन्द गर्ने र पार्टीको झन्डा आधा झुकाउने निर्णय गरेको छ । त्यस्तै पार्टीले पार्टी स्याङ्जा जिल्ला कार्यालय तीन दिन बन्द गर्नुका साथै पार्टीको झन्डा आधा झुकाउने, केन्द्रीय कार्यालय र सम्बन्धित स्याङ्जा जिल्ला कार्यालयमा १३ दिनसम्म शोकपुस्तिका राख्ने र १३औँ दिन स्याङ्जाको सदरमुकाममा श्रद्धाञ्जली सभा आयोजना गर्ने निर्णय गरेको सचिव शर्माले जानकारी दिए ।

०१९ जेठ १९ गते स्याङ्जाको भीरकोट नगरपालिका– ६ मा जन्मिएका पंगेनी ०७० को संविधानसभा निर्वाचनमा स्याङ्जा– २ बाट संविधानसभा सदस्यमा निर्वाचित भएका थिए । स्वर्गीग पंगेनीका श्रीमती, एक छोरा र एक छोरी छन् ।