जिल्ला ट्राफिक प्रहरी कार्यालय बाग्लुङले आर्थिक वर्ष ०७४–७५ मा ट्राफिक नियम उल्लंघन गर्ने सवारीसाधनका चालकलाई कारबाही गरी रु. ५१ लाख ४२ हजार राजस्व संकलन गरेको छ ।
ट्राफिक नियमविपरीत सवारीसाधन चलाएका सात हजार ८ सय २४ चालकलाई कारबाही गरिएको थियो । यस क्रममा ६ सय १५ ट्रक चालक, ६४१ बसचालक, तीन हजार २ सय ८९ कार–जीपचालक, दुई हजार १ सय ६१ मोटरसाइकल–स्कुटर चालक, एक हजार ९८ ट्याक्टरचालक तथा अन्य सवारीसाधनका २० चालक कारबाहीमा परेका हुन् । सवारीदर्ता, नामसारी, सवारीचालक अनुमतिपत्र नभएका तथा अनुमतिपत्र नवीकरण नगर्ने चालकलाई कारबाही गरिएको ट्राफिक प्रहरी प्रमुख छबबहादुर घर्तीले जानकारी दिए ।
ट्राफिक नियम पालनमा कडाइ गर्न थालेपछि राजस्व बढ्दै गएको घर्तीले बताए । आव ०७३–७४ मा सवारीसाधनका चालकलाई कारबाही गरी रु. ५१ लाख १० हजार राजस्व संकलन गरिएको थियो । ‘सवारी नियम उल्लंघन गर्ने चालकलाई अझै कडाइ गर्छौं,’ उनले भने ।
प्रतिक्रिया