भ्रष्टाचारको आरोपमा कारागारमा रहेका पाकिस्तानका पूर्वप्रधानमन्त्री नवाज सरिफलाई दिवंगत पत्नीको दाहसंस्कार गर्न अन्तरिम जमानतमा रिहा गरिएको सरकारी स्रोतले बताएको छ । सरिफकी पत्नी कुलसुम नवाजको मंगलबार लन्डनमा अर्बुद रोगका कारण निधन भएको थियो ।

कुलसुमलाई अस्पताल भर्ना गरेर पाकिस्तान फर्किएका नवाज सरिफ र उनकी छोरीलाई पक्राउ गरी भ्रष्टाचारको आरोपमा थुनामा राखिएको छ । पाकिस्तानको संसदीय चुनावमा पाकिस्तान मुस्लिम लिग–नवाज (पीएमएल) पार्टीका लागि चुनावी प्रचारका लागि सरिफ पाकिस्तान फर्किएका थिए ।

सरिफ र उनकी छोरी मरयामलाई प्लेनमा राखेर लाहोर पु¥याइएको छ । कुलसुमको दाहसंस्कार लाहोरमा गर्ने कार्यक्रम रहेको पीएमएलले जनाएको छ ।

उनीहरू दुवैलाई १२ घन्टाका लागि छाडिएको भए पनि गृह मन्त्रालयले उनीहरूको जमानतको अवधि बढाउन सक्ने रावलपिण्डी केन्द्रीय कारागारका एक अधिकारीले बताए । स्थानीय सञ्चारमाध्यमले दाहसंस्कार शुक्रबार मात्र गरिने बताएका छन् ।

राजनीतिमा पनि सक्रिय ६८ वर्षीया कुलसुमले नवाज सरिफको राजनीतिलाई अघि बढाउन महत्वपूर्ण भूमिका निर्वाह गरेकी थिएन् । उनलाई क्यान्सर भएको गत वर्ष अगस्टमा पत्ता लागेको थियो । महिनौँदेखि लन्डनस्थित एक निजी अस्पतालमा उनको उपचार भइरहेको थियो ।

नवाज सरिफविरुद्ध तीव्र प्रचार गरेर चर्चामा आएका प्रधानमन्त्री इमरान खानले कुलसुमको निधनप्रति दुःख प्रकट गरेका छन् ।