नेपाल भलिबल संघको आयोजना तथा बाग्लुङ जिल्ला भलिबल संघको व्यवस्थापनमा राष्ट्रिय महिला भलिबल प्रतियोगिता असोज २३ गते मंगलबारदेखि बाग्लुङको गल्कोट शुरु भएको छ । गल्कोट नगरपालिकाको मुख्य सहयोगमा असोज २७ सम्ममा प्रतियोगिता सञ्चालन हुनेछ ।

प्रतियोगिताका लागि गल्कोट नगरपालिकाले ५ लाख सहयोग गरेको बाग्लुङ जिल्ला भलिबल संघका अध्यक्ष यमबहादुर श्रीषले जानकारी गराएका छन् । प्रतियोगिताका लागि गल्कोट स्पोर्टस् क्लब जापान र गल्कोट समाज जापनले २ लाख ५० हजार सहयोग गरेका छन् ।

त्यस्तै बाग्लुङ समाज दक्षिण कोरियाले पनि १ लाख सहयोग गरेको छ । संघीय ढाँचामा आयोजन हुने प्रतियोगितामा ७ प्रदेश र तीन विभागीय टिम गरी १० टिमको सहभागिता रहने बाग्लुङ जिल्ला भलिबल संघका अध्यक्ष श्रीषले जनाएका छन् । प्रतियोगिताको सर्वोत्कृष्ट खेलाडीले १० हजार पाउनेछन् । त्यस्तै व्यक्तिगत विधातर्फ उत्कृष्ट हुने स्पाइकर, सर्भर, लिबेरो, सेटर र ब्लकरलाई समान ५ हजार प्राप्त गर्नेछन् ।

प्रतियोगिता लिगकम नकाउटका आधारमा सञ्चालन हुनेछ । प्रतियोगिताको उद्घाटन गल्कोट नगरपालिकाका मेयर भरत शर्मा गैरेले गर्नेछन् ।