कर्णाली प्रदेशका भूमि व्यवस्था, कृषि तथा सहकारी मन्त्री बिमला केसीले कर्णाली समृद्धिका लागि सहकारी अभियानमा जोड दिइएको बताइन् । सुर्खेत लेकबेसी नगरपालिकाको समृद्धि कृषि सहकारी संस्था लिमिटेडको नवनिर्मित कृषक तालीम भवनको उद्घाटन कार्यक्रमलाई सम्बोधन गर्दै सहकारी मन्त्री केसीले सो कुरा बताएकी हुन् ।

सहकारीबिना आर्थिक विकास र स्वरोजगार असम्भव रहेको औँल्याउँदै मन्त्री केसीले भने, ‘कृषि क्षेत्रमा नमूना काम गर्ने सहकारी, कृषक तथा कृषि समूह एवं फर्मका लागि रु तीन करोड बजेट विनियोजन गरिएको छ ।’ ‘किसानहरुले उत्पादन गरेको बीउ न्यूनतम मूल्य दिएर खरीद गर्छौं र उनीहरुलाई एक प्रतिशत पनि निराश हुन दिने छैनौँ,’ उनले थपे, ‘सरकारी अनुदान किसानमा पुगेन बरु बिचौलियाहरुले खाए ।’

प्रदेशसभा सदस्य सीता नेपालीले तीन खम्बे अर्थनीतिमा सहकारी एक रहेको बताउँदै अबको सहकारी सञ्चालकमा नभई सदस्यमा केन्द्रित हुने ऐन तथा रणनीति तयार गर्न थालिएको जनाइन् ।

पूर्वसांसद ललिता रेग्मी, प्रधानमन्त्री कृषि आधुनिकीकरण सुर्खेतका वरिष्ठ कृषि अधिकृत चित्रबहादुर रोकाय, लेकबेसी नगरपालिकाका प्रमुख गगनसिंह सुनारले नेपाल कृषि प्रधान देश भए पनि अहिले यो क्षेत्र निराशाजनक अवस्थामा पुगेको चिन्ता प्रकट गरे ।

उक्त सहकारी संस्थाका अध्यक्ष देवबहादुर रानाले नौ हेक्टर जमीनको क्षेत्रफलबाट धान, मकै, मसुरो, तोरीलगायत अन्नको बीउ उत्पादन गर्दै अहिले तिनै बीउ २०० हेक्टर क्षेत्रफलको जमीनमा उत्पादन गर्न थालिएको बताए ।