१६ नोभेम्बर २०१८ मा हङकङमा सम्पन्न भएको ओक्सफाम ट्राइल वाकर रेसमा सहभागिता जनाई पदक जित्न सफल नेपाली खेलाडी मंसिर ११ गते मंगलबार स्वदेश फर्किएका छन् । उक्त प्रतियोगितामा सय किलोमिटर अल्ट्रा दौडतर्फ नेपाली महिला टिमले दोस्रो स्थान हासिल गर्दै रजत पदक जितेको थियो । नेपाली महिला टिमले उक्त दूरी १६ घन्टा ३० मिनेटमा पार गरेको थियो ।

गत वर्ष महिला टिमतर्फ च्याम्पियन बनेको चिनियाँ टिम सय किलोमिटरको निर्धारित दूरी १८ घन्टा १३ मिनेटमा पार गर्दै प्रथम भएको थियो । नेपाली महिला टिमले गत वर्ष चिनियाँ टोली राखेको समयभन्दा १ घन्टा ४७ मिनेटअघि दौड पूरा गरे पनि दोस्रो स्थानमै चित्त बुझाउनुपरेको थियो । सय किलोमिटरको दौड चारजना खेलाडीले मिलेर पूरा गर्नुपर्छ । यो खेलमा प्रत्येक देशबाट चारजना खेलाडीको टिम रहेको हुन्छ ।

यो सय किलोमिटरको प्रतिस्पर्धामा नेपालको तर्फबाट सुनमाया बुढा, रसिला तामाङ, छेती शेर्पा (राई) र छोकी शेर्पाले प्रतिस्पर्धा गरेका थिए । चारजनाले २५ किलोमिटरको दौड पूरा गर्नुपर्ने भएकाले यो दौड पूरा गर्न निकै कठिन हुन्छ । यसका लागि लामो प्रशिक्षण र शारीरिक र मानसिक रूपमा पूर्ण रूपमा तयार हुनुपर्छ । दरिलो आत्मविश्वास भएका खेलाडी यस्तो प्रतियोगितामा प्रतिस्पर्धा गर्न सक्ने बालाजु कराते डो प्रतिष्ठान नेपालका अध्यक्ष ध्रुवबहादुर मल्लले बताए । प्रतियोगितामा सहभागी हुन खेलाडीले १ वर्षदेखि तयार गरेको मल्लले बताए ।

त्यस्तै ५० किलोमिटर प्रतियोगितामा प्युठानकी हुमी बुढा मगरले ७ घन्टा ८ मिनेटमा दूरी पूरा गर्दै प्रथम स्थान हासिल गरेकी थिइन् । दोस्रो स्थान हासिल गरेकी हङकङकी खेलाडीले ७ घन्टा ११ मिनेटमा उक्त दूरी पार गरेर रजत पदक जितेकी थिइन् । त्यस्तै जापानकी खेलाडीले ७ घन्टा ५५ मिनेटमा दौड पूरा गरी कांस्य पदक जितेकी थिइन् ।

प्रसिद्ध अल्ट्रा धाविका मीरा राईको नेतृत्वमा ‘मीरा राई इनिसियटिभ’ र एक्सचेन्ज एन्ड इमपावरको सहयोगमा नेपाली खेलाडीले यो प्रतियोगितामा सहभागिता जनाएका थिए ।