युवा तथा खेलकुदमन्त्री जगतबहादुर सुनार (विश्वकर्मा)ले आकस्मिक रूपमा मंसिर १३ गते बिहीबार दशरथ रंगशालाको निरीक्षण गरेका छन् । मन्त्री सुनार बिनाजानकारी आकस्मिक रूपमा दशरथ रंगशालाको निरीक्षणमा आएको स्रोतले जनाएको छ । सो अवसरमा राखेपका उपाध्यक्ष पीताम्बर तिम्सिना सँगै भए पनि अन्य पदाधिकारी नभएको बुझिएको छ ।

दशरथ रंगशालाको निरीक्षणपछि निकै चिन्तित र आक्रोशित देखिएका मन्त्री सुनारले त्यसपछि राष्ट्रिय खेलकुद परिषदका सदस्यसचिव केशवकुमार विष्ट र निर्माण प्रमुख अरुण उपाध्यायप्रति खनिएको परिषदका कर्मचारीले घटना र विचारलाई जानकारी गराएका छन् ।

समयमा काम भएन, दशरथ रंगशालाको निर्माणमा ढिलाइ भो, १३औँ दक्षिण एसियाली खेलकुद प्रतियोगिता र आठौँ राष्ट्रिय खेलकुद प्रतियोगिता समयमा हुन नसक्ने भो । उनले भने, ‘मेरो मन्त्री पद जाने भो, राखेपका पदाधिकारीहरूले मेरो मन्त्री पद खाने भए ।’ मन्त्री सुनारले आक्रोश पोखेको निरीक्षण क्रममा मन्त्रीसँगै रहेका एक कर्मचारीले बताए । ०७२ सालमा आएको विनाशकारी भूकम्पले दशरथ रंगशाला नराम्रोसँग प्रभावित भएको थियो । जसको निर्माण ०७४ को अन्तिमतिरबाट मात्रै मात्रै शुरु भएको थियो ।

दशरथ रंगशालाको निर्माणप्रति पहिल्यैदेखि चिन्ता प्रकट गर्दै आएका मन्त्री सुनारले दशरथ रंगशालाको निर्माण पूरा नभएसम्म १३औँ दक्षिण एसियाली खेलकुद प्रतियोगिता (साग) को बारेमा कुनै निर्णय नगर्ने बताउँदै आएका छन् । वर्तमान अवस्थामा दक्षिण एसियाली मुलुकका राष्ट्रहरूले १३औँ सागको मिति तोक्न दबाब दिए पनि दशरथ रंगशालाकै कारण देखाएर मन्त्री सुनारले अहिलेसम्म निर्णय गरेका छैनन् ।