पूर्व अर्थमन्त्री डा. रामशरण महतले शेयर बजार निरन्तर आरालो लाग्नु अर्थतन्त्रका निम्ति नकारात्मक सूचक रहेको बताएका छन् ।

नेपाल आर्थिक पत्रकार संघ (नाफिज) का नवनिर्वाचित पदाधिकारीको सम्मानमा बुधबार मिडिया इन्टरनेशन द्धारा आयोजित कायक्रममा डा. महतले सो कुरा बताएका हुन । पद सुहाउँदो जनशक्तिको अभाव, सुशासनको अभाव, जिम्मेवारी र रकमको बाँडफाँडमा समस्या, फजुल खर्चे प्रवृत्ति, धेरै राजनीतिक पद लगायतका कारण मुलुकमा आशावादी अवस्था नदेखिएको डा. महतको भनाई छ । सामाजिक सुरक्षा कोषको योजना १०÷१२ वर्षदेखि नै सुरु भएको जानकारी गराउँदै उनले यसको कार्यान्वयन पश्चात् सरकारले गरेको प्रचारलाई फजुल खर्च भएको दाबी रहेको छ । सरकारद्धारा ठूलठूला कुरा गरेर आशा देखाइए पनि वास्तविक समस्या बुझेर समाधान गर्नेतर्फ ध्यान नजाँदा संरचनागत परिवर्तनका वावजुद पनि मुलुकको आर्थिक अवस्थामा परिवर्तन आउन नसकेको उनको धारणा छ ।

कार्यक्रममा अर्थविद् डा. चन्द्रमणी अधिकारीले एकअर्कालाई दोषारोपण गर्ने प्रवृत्ति हटाउनुपर्ने बताए । अहिले उपभोगको मात्रै अन्तराष्ट्रियीकरण भएको भन्दै उनले अब उत्पादनको पनि अन्तराष्ट्रियीकरण गर्नुपर्नेमा जोड दिए । अर्थतन्त्रमा निजी क्षेत्रको योगदान ९० प्रतिशत नपुर्याएसम्म वास्तविक निजीकरण नहुने उनको भनाई छ ।

त्यस्तै,गरी शेयर बजार विज्ञ डा. गोपाल भट्टले नीतिगत व्यवस्थामै भएको कमजोरीका कारण बैंकिङ क्षेत्र एवम् पुँजी बजारमा समस्या देखिएको बताए । बैंकिङ क्षेत्रमा तरलता छ भने सुरक्षित क्षेत्र हेरेर लगानी गर्न पाउने नीति तयार गरिनुपर्ने उनले बताए । अहिलेको अवस्थामा सीसीडी रेसियोमा रिल्याक्सेसनको आवश्यकता रहेको उनले औँल्याए । कार्यक्रममा बोल्दै चेम्बर अफ कमर्श, प्रदेश नं. ५ का अध्यक्ष भीमलाल पौडेलले निजी क्षेत्रलाई काम गर्ने वातावरण नभएको बताए ।