निजी तवरले राखिएका हतियारका कारण हिंस्तात्मक घटना बढेर वर्षेनी सयौँ नागरिकको ज्यान जान थालेपछि संयुक्तराज्य अमेरिकाको बाल्टिमोर प्रहरीले नयाँ कदम उठाएको छ । त्यहाँको प्रहरीले झण्डै दुई हजार थान हातहतियार जनतासँग खरिद गरेको छ, जसमा रकेट लन्चरसमेत रहेका छन् ।

अमेरिकाको पूर्वीक्षेत्रमा रहेको बाल्टिमोर नगरमा हिंसात्मक घटना बढ्दै गएपछि प्रहरीले आम जनतासँग रहेका त्यस्ता हातहतियार किनेर फिर्ता लिएको हो । गत साता सञ्चालित तीनदिने अभियानका क्रममा गैरकानुनी समेतका हातहतियार खरिद गरिएको बाल्टिमोर प्रहरीलाई उद्धृत गर्दै एएफपीले जनाएको छ ।

उक्त सहरमा लगातार चार वर्षदेखि बर्सेनि ३०० जनाभन्दा बढी व्यक्तिको एकअर्का विरुद्ध आक्रमणबाट मृत्यु भएको छ ।

एकजना प्रहरी प्रवक्ताले प्रहरी अधिकृतले एक हजार ८६० वटा हातहतियार सङ्कलन गरेको जानकारी दिए भने नगरका मेयरले ट्वीट गरी एउटा रकेट लन्चरसमेत बरामद भएको बताएका छन् ।

प्रहरीले ठूलो म्यागजिन लाग्ने हतियारको २५ डलर, ह्यान्डगन र राइफलको १०० डलर, अर्ध स्वचालित राइफलको २०० डलर र स्वचालित राइफलको ५०० डलर दिने घोषणा गरेको थियो ।

यो अभियानका लागि दुई लाख ५० हजार डलर बजेट व्यवस्था गरिएको थियो भने ‘बाल्टिमोर सन’ नामक स्थानीय खबारले उक्त कार्यक्रम समय, रकम र स्रोतको बर्बादी भनी टिप्पणी गरेको छ ।

तर, प्रहरी प्रमुख गेरी गटलले नगर निवासीसँग बन्दुक नै नभएको अवस्थामा बन्दुकको प्रयोगबाट हुने हत्या र हिंसात्मक घटनामा स्वतःकमी आउने दाबी गरेका छन् ।

अमेरिकी संविधानको दोस्रो संशोधनले मानिसलाई हतियार राख्न पाउने अधिकार दिएको छ र अमेरिकी एक तिहाई घरपरिवारमा हातहतियार रहेको छ ।

ज्ञातव्य छ, संयुक्तराज्य अमेरिकामा सन् २०१७ मा हातहतियारको प्रयोगबाट झण्डै ४० हजार मानिसको मृत्यु भएको थियो ।