प्रहरीले नेत्रविक्रम चन्द ‘विप्लव’ले नेतृत्व गरेको नेपाल कम्युनिष्ट पार्टीको सिन्धुपाल्चोक जिल्ला कमिटी सदस्य रञ्जीतसिंह ठकुरीसहित १७ कार्यकर्तालाई नियन्त्रणमा लिएको छ ।

उनीहरुलाई शनिबार राति सिन्धुपाल्चोकको चौतारा साँगा चोकगढी नगरपालिका–१० कार्कीटारमा एक व्यक्तिको घरमा सुतिरहेको अवस्थामा नियन्त्रणमा लिइएको प्रहरीले जनाएको छ । बताइएअनुसार पक्राउ परेकाहरुलाई राज्यविरुद्धको अपराधअनुसार मुद्दा चलाइने र थप अनुसन्धानका लागि सिन्धुपाल्चोक जिल्ला अदालतबाट १० दिनको म्याद थप भएको छ ।

पक्राउ पर्नेमा १३ पुरुष र चार महिला छन् । उनीहरुको साथबाट सैन्य तालिम गराउने दस्तावेज, चन्दा सङ्कलनको लेटरप्याड, सरकार विरुद्धको पर्चा पम्पलेटलगायत कागजात बरामद गरिएको प्रहरीको भनाई छ । जिल्लाका व्यवसायी, क्रसर उद्योग, कर्मचारी, शिक्षकलगायतबाट चन्दा असुली गरेको पाइएको जिल्ला प्रहरी कार्यालय सिन्धुपाल्चोकले जनाएको छ ।