राष्ट्रिय प्रजातन्त्र पार्टी संयुक्तका अध्यक्ष पशुपति सम्शेर राणाले राष्ट्रपतिको भुमिका निष्पक्ष हुन नसकेको आरोप लगाएका छन् ।

सो पार्टीको प्रदेश नम्बर २ भेलाको क्रममा बुधबार राजविराजमा सम्बोधन गर्दै राणाले बहुदलीय प्रणालीमा राष्ट्रपतिको भूमिका निश्पक्ष हुन नसकेको आरोप लगाउँदै सर्वसम्मत संस्थाको आवश्यकता रहेकोमा जोड दिए ।

उनले भने, ‘कांग्रेसको राष्ट्रिपति भए कांग्रेस जस्तो, कम्युनिष्टको राष्ट्रपति भए कम्युनिष्ट जस्तो भूमिका निर्वाह गरेकोले सर्वसमत संस्था देशलाई आवश्यक छ ।’

देशको मौलिक पहिचान हिन्दुराष्ट्र रहेको र त्यसलाई कांग्रेस र कम्युनिष्ट मिलेर मेटेकाले हिन्दुराष्ट्रको पहिचान पुनर्स्थापित गर्न आफ्नो पार्टी सडकमा उत्रिन लागेको जानकारी समेत उनले दिए ।

देशको मौलिक पहिचान मेटाउन नसकिने भन्दै उनले भने जसरी नेपाल सगरमाथाको नाममा चिनिन्छ त्यस्तै एक मात्र हिन्दुराष्ट्रको नाममा पनि चिनिन्छ ।

वर्तमान दुई तिहाईको सरकारले देशको विकासका लागि प्राप्त गरेको सुनौलो मौका नेपाली जनताको पक्षमा सदुपयोग गर्न नसकेको आरोप लगाउँदै उनले भने, ‘प्राप्त अवसर सरकारले खेर पाल्यो र भ्रष्टाचारमा चुर्लुम्म डुब्यो ।’

केन्द्र र प्रदेशदेखि स्थानीय तहको वडा-वडासम्म भ्रष्टाचारको विकेन्द्रीकरण भएको भन्दै उनले वर्तमान सरकार अरु क्षेत्रमा सफल हुन नसकेपनि वडा तहसम्म भ्रष्टाचार पुऱ्याउन सफल भएको दाबी उनले गरे ।

मधेशलाई पिछडीएको भागको रुपमा राखेर देश नबन्ने भन्दै उनले बेलाबेलामा सरकारले मधेशको कुरा गरे पनि मधेशको पक्षमा कुनै ठोस काम गर्न नसकेको आरोप समेत लगाए ।

कार्यक्रममा पार्टीका अर्का अध्यक्ष डा. प्रकाश चन्द्र लोहनीको पनि उपस्थिति रहेको थियो ।